Այսպիսի աբսուրդ դուք նախկինում տեսե՞լ եք, որ ռուպրով խոսելու համար մարդկանց բերման ենթարկեն. պատգամավոր

Ես այստեղ եմ եկել միայն այն բանի համար, որ ոստիկանությունը զգուշացրել էր, որ ռուպր օգտագործելու համար բերման է ենթարկելու մարդկանց: Այս մասին այսօր կառավարության շենքի դիմաց լրագրողների հետ զրույցում ասաց «Հայաստան»  դաշինքի պատգամավոր Քրիստինե Վարդանյանը: 

«Ես եկել էի այստեղ՝ հույս ունենալով, որ մարդկանց ներկայությունը կստիպի ոստիկանությանը զերծ մնալ անօրինական գործողություններից: Հիմա մի քանիսին բերման են ենթարկել, մեկին՝ ռուպրով խոսելու, մեկին՝ պարզապես ձեզ հարցազրույց տալու համար: Եթե ՀՀ-ում մարդկանց բերման են ենթարկում ռուպրով խոսելու համար, ապա ոստիկանությունը պիտի համարի, որ ես հիմա ռուպրով եմ խոսում: Եթե իմ ընկերներին բերման են ենթարկում «հողատու» և «դավաճան» ասելու համար, ապա ես կրկնում եմ այդ բառերը՝ հողատու է և դավաճան է: Եթե մարդկանց բերման են ենթարկում հարցազրույց տալու համար, ապա ես հիմա հարցազրույց եմ տալիս: Ո՞նց եք որոշում՝ ում եք բերման ենթարկում, ձեզ զանգում, ասում են՝ էս մարդուն բերման ենթարկեք, էս մեկին թողե՞ք»,- ասաց պատգամավորը: 

Նրա խոսքով՝ այս իշխանություններին պետք չէ փորձել հասկանալ, պարզապես քաղաքացիներին պետք է հարցնել՝ ինչի՞ց էիք դուք ուզում ազատվել 2018 թվականին, երբ համատարած փողոցներ էիք փակում, և հարց տալ՝ կարողացա՞ք ազատվել, թե՞ կրկնապատիկ ավելի վատ իրավիճակում հայտնվեցինք:

«Այսպիսի աբսուրդ դուք նախկինում տեսե՞լ եք, որ ռուպրով խոսելու համար մարդկանց բերման ենթարկեն, մարդկանց զրկեն օրինականությունից: Սա է նիկոլփաշինյանական իրականությունը, դուք երևի կա՛մ պետք է հաշտվեք, որ այս իրականությունում եք ապրելու, ապրում ձեր երեխեքի հետ, կա՛մ եկեք հասկանանք՝ էս իրավիճակից ոնց պիտի դուրս գանք»,- ասաց Վարդանյանը՝ դիմելով ՀՀ քաղաքացիներին:

Ինչ վերաբերում է ոստիկաններին, ապա նրանք, ըստ պատգամավորի, ասել են, որ կառավարության աշխատանքը չեն կարող խանգարել:

«Գիտե՞ք, եթե այս կառավարության աշխատանքը պիտի ռուպրով խանգարենք, ապա երևի բոլոր հայրենակիցներով ամեն մեկս մի ռուպր վերցնենք, գանք այստեղ ամեն օր աղմուկ անենք, որովհետև այս կառավարության աշխատանքը Հայասատանի Հանրապետության շահերին հակասում է: Պիտի ամեն ինչ անենք, որ այս կառավարությունը չաշխատի»,- ասաց Վարդանյանը: