Մենք չգիտենք՝ ովքե՞ր ենք․ հադրութցիները կարգավիճակ չունեն․ նրանք իրենց խնդրով կրկին կառավարության մոտ են (տեսանյութ)

Հադրութից բռնի տեղահանված բնակիչները դարձյալ Կառավարության շենքի մոտ են։ Նրանք 8 ամսից ավելի է՝ մշտական բնակության վայր չունեն, պատերազմից հետո կորցրել են իրենց բնակարանները։ ՀՀ և ԱՀ կառավարություններից պահանջում են իրենց ապահովել բնակարաններով։ 

Բնակիչները 45 օր առաջ նամակ են ուղղել կառավարությանն ու, պատասխան չստանալով, եկել նամակի հետևից։ Այժմ նրանց մտահոգում է իրենց կարգավիճակը։

«Մենք չգիտենք՝ ովքե՞ր ենք․ ունենք պարտականություններ, բայց ոչ մի իրավունք չունենք։ Շուտով ձմեռ է՝ բնակարանային հարցի լուծում չկա։ Սոցվճարները երկու ամիս է դադարեցված են, և ժողովորդը հետագա ճակատագիրը չգիտի։ Մենք ՀՀ քաղաքացու անձնագիր ունենք, սակայն ՀՀ քաղաքացի չենք ու ոչ ոք չի ասում, թե որ պետության քաղաքացի ենք»,- ասաց Հադրութի բնակիչներից մեկը։

Նրանք զրկվել են նաև պետության կողմից իրենց հատկացվող 68 հազար դրամից։

Նախորդ ակցիաների ժամանակ, հադրութցիները վճռել էին դիմել օտարերկյա դեսպանատներին։ Այսօր արդեն ասում են, որ իրենց շատերն դիմել են, բայց դեռ արձագանք չեն ստացել։

Իսկ սեպտեմբերի 1-ի դրությամբ էլ 2500 հադրութցի արտագաղթել են։ Մյուսները ևս պատրաստել մեկնել Հայաստանից։