Սերժ Սարգսյանի՝ երկրի ղեկավար եղած ժամանակ բաներ են եղել, որոնք ինձ համար շատ ընդունելի են եղել․ մենք չենք ասում, որ Նիկոլ Փաշինյանն անսխալական է․ Աղազարյան

«ԱԺ հարգարժան փոխխոնակ, պարոն Ռուբինյան, հիմա ինձ մի բան թույլ կտամ, որը, հուսով եմ, կլինի վերջինը՝ այս ամբիոնից»։ ԱԺ-ում իր ելույթի ժամանակ ասաց «Քաղաքացիական պայմանագիր» խմբակցության անդամ Հովիկ Աղազարյանը։

Նա հորդորեց ԱԺ փոխխոսնակ Ռուբեն Ռուբինյանին թույլ չտալ մյուս պատգամավորներին՝ շեղվել քննարկվող հարցի էությունից, քանի որ դա բերում է «լրացուցիչ լարվածության»։

«Արգելեք այդ ամեն ինչը։ Դա բերում է լարվածության։ Լրացուցիչ օջախ է առաջանում մեր ընդդիմադիր գործընկերների հետ՝ առանց այդ էլ դեռ չճշտած որոշ հարցերում։ Կանխարգելեք այդ ամեն ինչը։ Արգելե՛ք, խնդրում եմ, կոչ եմ անում ձեզ, հարգե՛ք մյուսներին, թույլ մի՛ տվեք, որ պատգամավորները շեղվեն քննարկվող հարցերից»,- ասաց Աղազարյանը։

Նրա բողոքն, ընդհանուր առմամբ, վերաբերում էր ընդդիմադիր խմբակցությունների պատգամավորների հայտարարություններին։

«Հայաստան» խմբակցության պատգամավոր Արամ Վարդևանյանն էլ Աղազարյանից հետաքրքրվեց, թե հիշու՞մ է արդյոք նա ընդդիմադիր Նիկոլ Փաշինյանի ելույթները նախկին գումարումների խորհրդարանում։

«Իհարկե, հետևել եմ և ինձ միշտ թվացել է, որ նրանք, ովքեր թույլ են տվել այդպիսի բաներ ոչ միայն պարոն Փաշինյանի, այլ, ընդհանրապես, այլ պատգամավորների պարագայում, դա արել են իրենց այս կամ այն քայլը հետո հիմնավորելու համար նաև։ Հիմա ի՞նչ կապ ունի ձեր դիտողությունը։ Հո մենք չե՞նք ասում, որ մեզանից յուրաքանչյուրը, այդ թվում՝ Նիկոլ Փաշինյանը, անսխալական է եղել, և ինչը որ ասել ենք մենք, ինչը որ ասել է Նիկոլ Փաշինյանը, դա ճիշտ է։ Լավը վերցնենք, ինչպես ես բազմաթիվ անգամ առիթ եմ ունեցել ասելու, որ, մասնավորապես, Սերժ Սարգսյանի՝ երկրի ղեկավար եղած ժամանակ բաներ են եղել, որոնք ինձ համար շատ ընդունելի են եղել։ Լավը վերցնենք, վատը թողնենք մի կողմ»,- ասաց Աղազարյանը։