Հիմա տեսա՞ք՝ ով փայ մտավ. սա Հայաստանի պատմության մեջ ամենամութ գործարքն է. Քոչարյան (տեսանյութ)

Այս իշխանության գերնպատակն իշխանությունը պահելն է. իզմ-եր չունեցող իշխանությունն անելու է ամեն ինչ սեփական իշխանությունը պահելու համար: Այս մասին այսօր մամուլի ասուլիսի ժամանակ ասաց ՀՀ երկրորդ նախագահ, «Հայաստան» դաշինքի ղեկավար Ռոբերտ Քոչարյանը:

«Եթե այս պահին դա ավելի ձեռնտու է անել Ռուսաստանի հետ, անելու է Ռուսաստանի հետ, եթե վաղը ձեռնտու դառնա անել Թուրքիայի հետ, անելու է Թուրքիայի հետ: Այստեղ մի փնտրեք բարդ սխեմաներ, այստեղ շատ պարզ տարբերակ է՝ այսօր սա է ձեռք տալիս, սա եմ անում: Իզմ-երի պակասության անբարոյականությունը հենց սրա մեջ է, որ դու չես կապում սկզբունքների հետ: Սկզբունքն աթոռը պահելն է»,- ասաց ՀՀ երկրորդ նախագահը:

Անդրադառնալով ԶՊՄԿ-ի շուրջ առաջացած աղմուկին՝ Քոչարյանն ասաց, որ դա այն կոմբինատն է, որն անընդհատ իր հետ է կապվում, սակայն, նրա խոսքով, ինքը դրա հետ երբևէ որևէ կապ չի ունեցել:

«Դա արվում էր «Հայկական ժամանակ» թերթի կողմից հետևողականորեն՝ ավելի քան 10 տարի: Հիմա ո՞վ փայ մտավ: Հիմա նայեք՝ ով փայ մտավ և ում հետ փայ մտավ: Երևի Հայաստանի պատմության մեջ ամենամութ գործարքն է, անհասկանալի տրամաբանությամբ: Չես հասկանում՝ ինչու ինչ-որ նվիրաբերություն է արվում, և այդ փայը փոխանցվում է վարչապետի աշխատակազմին: Աբսուրդ է: Պետական բաժնեմասերը պետք է կառավարվեն Ֆինանսների նախարարության կողմից, կարող է՝ Էկոնոմիկայի նախարարության կողմից, բայց ի՞նչ գործ ունի, ի՞նչ մասնագիտական հմտություն ունի վարչապետի աշխատակազմը նման գործառույթ ունենալու համար: Սա ուղղակի փայ մտնել է Հայաստանի ամենախոշոր ամենագրավիչ ակտիվի կառավարման մեջ՝ ֆինանսական հոսքերը կառավարելու համար: Այլ բացատրություն չկա: Սա կոռուպցիայի դրսևորումների առումով բարձրագույն պիլոտաժ է՝ լկտիության հասնող»: