Սա Վանաձորի Բազում թաղամասն է՝ անձրևից մի քանի ժամ հետո... հեղեղատարնե՞ր՝ չենք լսել (տեսանյութ)

Վանաձորի բնակչուհի Նարինե Մաթևոսյանը ֆեյսբուքյան իր էջում հրապարակել է տեսանյութ և կից ներկայացրել, որ տարիներ շարունակ, հեղեղատարների բացակայության պատճառով, ինչպես նաև ջրահեռացման համակարգի հնամաշ լինելու հետևանքով, անձրևների ժամանակ ամբողջ թաղամասը հեղեղվում է։

«Սա Բազում թաղամասն է, Սուխումի 1 շենքի բակը, անձրևից մի քանի ժամ հետո... Ամբողջ թաղամասի անձրևաջրերը տարիներ շարունակ լցվում են և քայքայում շենքի հիմքը...»,-գրել է Նարինե Մաթևոսյանն ու հավելել, որ խնդրի լուծման ակնկալիքով բնակիչները դիմել են «Լուսավոր Հայաստան» կուսակցության անդամներ Անահիտ Կարապետյանին (ով նաև Վանաձորի ավագանու անդամ է) և Կարինե Ղուկասյանին։ 

Թեև խնդրին տեղյակ է նաև քաղաքապետ Մամիկոն Ասլանյանը, սակայն միչ օրս հարցը չի լուծվել, և անձրևաջրերը շարունակում են հեղեղել փողոցները։

«Հարգելի քաղաքապետ` Մամիկոն Ասլանյան, վերջապես ե՞րբ կլուծվի այս հարցը, թե՞ սպասենք, երբ կխարխլվի և շարքից դուրս կգա բազմաբնակարան շենքը...»,-իր գրառման մեջ նշել է Նարինե Մաթևոսյանը։

Հարկ է նկատել, որ Անահիտ Կարապետյանն արձագանքել է Նարինե Մաթևոսյանի գրառմանը և նշել, որ խնդիրը ներկայացրել է քաղաքապետարանի ուշադրությանը։

«Իմ բազում դիմումներին ի պատասխան ինձ ուղարկած պաշտոնական գրություններում գրված է, որ հնարավորինս սեղմ ժամկետում հարցը լուծում կստանա ու տվյալ խնդրի լուծման համար նախատեսված բյուջեն կբերվի ավագանու հաստատման։ Գիտեմ նաև, որ քանի անգամ եկել են տեղում չափումներ արել, բայց դե արդյունքը....»,-գրել է ավագանու ԼՀԿ անդամը։

Օգտատերերից Վազգեն Մինասյանն էլ նշել է, որ ոչ միայն այդ, այլև շատ այլ թաղամասերում ևս առկա է նման խնդիր․

«Նարեկացի 37 շենքը ահավոր ա անձրևից հետո․ ամեն հորդարատ անձրևից հետո 6-8 կամազ հող են տանում... ինչքան Նարեկացի 37 շենքի խնդիրը կլուծվի, այնքան էլ այս խնդիրը կլուծվի... Հույս չունենաք որ նմանատիպ խնդիրները լուծում կստանան: 20 տարի պատկան մարմիները նայում, գնում են...»,-գրել է օգտատերը․․․