Այս մարդիկ գալիս էին լոզունգներով, իսկ հիմա «ախրանիկապետությունը» հարյուրապատկել են. Աննա Մկրտչյան

«Այս մարդիկ գալիս էին լոզունգներով, որ իրենք ծանոթ-բարեկամներով հարցեր լուծելուն վերջ են տալու, որ 2018-ին ՀՀ քաղաքացին պայքարել է «ախրանիկապետության», «պադավատապետության» դեմ, էլի չգիտեմ, թե ինչ բառապաշար էին օգտագործում, իսկ հիմա այդ «ախրաննիկապետությունը» հարյուրապատկել են, «պադավատապետությունը» ավելի թանկարժեք մեքենաներով են փոխարինել և բոլոր պետական տենդերների նույնիսկ սահմանված կարգը, մրցույթի ձևական կարգը չեն պահպանում․ ընդամենը միանձնյա, խոշոր գնումներով կարողանում են ապահովել այն, ինչը որ իրենց պետք է»:

Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով Ալեն Սիմոնյանի կրտսեր եղբոր ղեկավարած ընկերություանը, որը վերջերս շահել է Ապարան համայնքի ներհամայնքային ճանապարհներն ասֆալտապատելու մրցույթը, ամիսներ առաջ էլ ընկերությունը ՏԿԵ նախարարության հետ 368 միլիոն դրամի պայմանագիր է կնքել։

«Այստեղ իրենց բարեկամ պաշտոնյաներն ստանում են միլիոնավոր պարգևավճարներ՝ արդարացնելով, որ նորմալ է, որ Ալեն Սիմոնյանը պարգևավճարներ կայացնելու մասին որոշում է կայացնում, նորմալ է, որ Ալեն Սիմոնյանը պետբյուջեի միջոցներով ունենալու է անձնական բժիշկ՝ այն ժամանակ, երբ ՀՀ-ում պետպատվերն ուղղակի կասեցվել է, իսկ հոկտեմբերի 1-ից ՀՀ յուրաքանչյուր աշխատող քաղաքացի պիտի ամեն ամիս մոտ 60 000 դրամ ծախսի, որպեսզի ՊՇՌ թեստ հանձնի՝ աշխատավայր մուտք գործել կարողանալու համար», - ասաց պատգամավորը: