Ռուսական կազարմայից միչև ռուսական ֆորպոստ

Ավետիսյանների ընտանիքի գործով դատական նիստն ընդմիջվեց, և այն կվերսկվի 2016 թ.-ի. հունվարի 18-ին, երբ արդեն լրացած կլինի այդ հանցագործության մեկ տարին:

Դատավարությունը, որն անցկացվեց Գյումրիի 102-րդ ռազմաբազայում, նախ առաջացրեց հարազատների վրդովմունքը, որ հայկական կողմը կատարում է ռուսական կողմի պատվերը, այլապես այս բազայի դռան մոտ չէին հավաքվի Ավետիսյանների հարազատները: Իսկ դռնից ներս արդեն ավելի տհաճ անակնկալ էր սպասվում տուժող կողմին: Հայկական դատարանում հսկողություն էին իրականացնում զինվորականի համազգեստով ռուս զինծառայողները, ովքեր կանգնել էին անմիջապես Պերմյակովի կողքին:

Թե որ իրավական հիմքով են ռուս զինված զինվորականները հայտնվել դատարանում, նույնիսկ դատավորը դրա պատասխանը չուներ: Այն, որ մի ամբողջ ընտանիք սպանած հանցագործի դատավարությունը տեղի է ունենում ռուսական ռազմաբազայում, ավելին` նրա անվտանգությունն ապահովում են ռուս զինված զինվորները, պարզապես ոտնձգություն է Հայաստանի դատական համակարգի նկատմամբ և ապացուցում է մեր դատարանների մերկությունն ու խայտառակությունը:

Հարկավոր է հիշել 2013 թ-ի Մերձմոսկովյան պատահարը, երբ Հայաստանից արտագնա աշխատանքի մեկնած ազատամարտիկ Հրաչյա Հարությունյանի մասնակցությամբ ճանապարհատրանսպորտային պատահար տեղի ունեցավ:

Ռուս իրավապահները դեպքից հետո սթրեսի ու կոմայի մեջ գտնվող Հրաչյային հատուկ սթափեցնող դեղեր էին ներարկել ու կանացի խալաթով տարել էին դատարան, և մեր հայրենակիցը անարգված ու ստորացված հայտնվեց օտար դատարանում:

Մինչդեռ մի ամբողջ ընտանիք ոչնչացրած ռուս մարդասպանը ոչ միայն լավ տեսքով էր ներկայացել դատական նիստին, այլ մի ամբողջ զինված խումբ պաշտպանում էր նրա անվտանգությունը:

Հայաստանը ամեն ժամ ռուսական կազարմայից վերածվում է նաև ռուսական ֆորպոստի, տարածք, որտեղ ինչպես ուզեն այնպես էլ կգործեն :