Ամանորին «Երևան Սիթի»-ում և «ՍԱՍ»-ում առաջանում են չարաշահումների ռիսկե՞ր

Տնտեսական մրցակցության պաշտպանության պետական հանձնաժողովը դեկտեմբերի մեկից սկսել է ամենօրյա մոնիտորինգ իրականացնել գերիշխող սուրեմարկետներում և գերիշխող ապրանքային շուկաներում:

Այս մասին newspress.am-ին հաղորդեց ՏՄՊՊՀ մամուլի քարտուղար Գայանե Սահակյանը:
Ըստ նրա, դիտարկումներ են իրականացրել «Երևան Սիթի», «ՍԱՍ», «Նոր Զովք, «Էվրիկա» սուպերմարկետներում, նաև «Աշտարակ կաթ», «Դուստր Մարիաննա», «Թամարա» և «Անի» (Անի կաթնամթերք) ընկերություններում, որոնք համարվում են գերիշխող:

Գ. Սահակյանը շեշտեց, որ դիտանցումների ժամանակ որևէ վարույթ չի հարուցվել, սակայն նկատի ունենալով Ամանորին առևտրի ավելացող ծավալները, առաջանում են նաև չարաշահումների ռիսկեր. «Մինչև դեկտեմբերի վերջին օրը խիստ վերահսկողություն ենք իրականացնելու: Այս պահի դրությամբ դեռևս մրցակցային օրենսդրության խախտման փաստեր չեն հայտնաբերվել»,-շեշտեց Գ. Սահակյանը` մանրամասնելով, որ կարագը, կաթնամթերքը, շաքարավազը, ձեթը, ալյուրը չի թանկացել նշված սուպերմարկետներում: Կաթնամթերք արտադրող և գերիշխող դիրք ունեցող երեք ընկերություններում ևս թանկացումներ չեն գրանցվել, չնայած որ Հայաստանում գործում է ևս 62 կաթնամթերք արտադրող ընկերություն, որոնք գերիշխող չեն և ՏՄՊՊՀ-ի տեսադաշտից դուրս են: