Այսօր դժվար է խոսել լիակատար անկախության մասին. Սեյրան Օհանյան (տեսանյութ)

Հուսով եմ՝ մենք ի վերջո կգանք մի այնպիսի իրավիճակի, որ միասնական ջանքերով այս իրավիճակից դուրս կգանք: Այս մասին այսօր Եռաբլուր զինվորական պանթեոնում լրագրողների հետ զրույցում ասաց «Հայաստան» դաշինքի խմբակցության ղեկավար Սեյրան Օհանյանը:

«Իհարկե, խոսել լիակատար անկախության մասին, այսօր դժվար է, որովհետև ինքնիշխանությունն առաջին հերթին արտահայտվում է նրանով, որ դու ունես բնակչություն, տարածք, տնտեսություն և այդ տարածքի տերն ես, տարածքային ամբողջականության, սահմանների անձեռնմխելիության տերն ես: Այսօր, երբ ադրբեջանցիները գտնվում են մեր սահմաններում, շատ-շատ տեղերում սադրանքներ են կազմակերպում, լկտի են պահում իրենց, մեր տարածքից դուրս չեն գալիս, խոսել լիակատար ինքնիշխանության համար շատ դժվար է: Բայց մենք պետք է հասկանանք, թե ե՞րբ է եղել հայ ազգի համար, որ մենք հեշտ իրավիճակում ենք ապրել, միշտ էլ պայքարի մեջ ենք եղել, միշտ էլ դժվարություններ են եղել, և կարծում եմ, որ ցանկացած այսպիսի հարված պետք է փորձենք օգտագործել գոտեպնդվելու և այս իրավիճակից դուրս գալու համար»,- ասաց պատգամավորը:

Հարցին, կարո՞ղ ենք դուրս գալ այս իրավիճակից, Օհանյանը դրական պատասխան տվեց.

«Կարծում եմ՝ կարող ենք, չափից ավելի կազմակերպված պետք է լինել: Այս իշխանություններն օր-օրի մեր երկիրը տանում են անկման, դա ակնհայտ երևում է, մենք հո չենք հորինում մեզնից: Պարտությունից հետո մեր հակառակորդը, որը խաղաղության թեզի նորքո փորձում է խաբկանքի մեջ գցել Հայաստանն ու Արցախը, օրըստօրե մխրճվում է մեր սահմանները, օրըստօրե սադրանքներ է կազմակերպում: Սյունիքում կազմակերպված սադրանքները խոսում են այն մասին, որ այս իշխանություններն ադեկվատ որոշում չեն կարող ընդունել, այս իշխանությունների մոտ ավելի լավ ստացվում է ինչ-որ բաներ կազմակերպել փողոցներում, հրապարակներում, բայց ոչ սահմանի վրա, բայց այսօր լիակատար ինքնիշխանություն ունենալու համար պետք է սահմաններն ամրապնդված լինեն»,- ասաց նա:

Մանրամասները՝ տեսանյութում