Սարգսյան-Ալիև հանդիպումը` աշխարհաքաղաքական նոր իրավիճակում

Շվեցարիայի Բեռնում դեկտեմբերի 19-ին ԵԱՀԿ Մինսկի խմբի համանախագահների միջնորդությամբ կհանդիպեն Հայաստանի և Ադրբեջանի նախագահները: Սա կլինի կարևոր հանդիպում, որովհետև տևական ժամանակ կողմերը, միջազգային հանրությունը սպասում է համանախագահների հանդիպմանը:

Սարգսյան –Ալիև նախորդ հանդիպումը տեղի էր ունեցել անցած տարվա հոկտեմբերի վերջին Փարիզում` Ֆրանսիայի նախագահ Ֆրանսուա Օլանդի նախաձեռնությամբ: Այդ հանդիպումից հետո նշվել էր, որ խաղաղ բանակցություններում առաջընթաց արձանագրելու համար կողմերը կարևորել են վստահության ամրապնդման ուղղությամբ ջանքերը, ինչպես նաև շեշտվել էր հակամարտության խաղաղ կարգավորման այլընտրանքի բացակայությունը:

Ցավոք, հանդիպմանն հաջորդած ժամանակահատվածը առանձնացավ լարվածության մեծացմամբ, շփման գծում զոհերի թվի աճով, լայնորեն կիրառվեց խոշոր տրամաչափի սպառազինություն: Ավելին ԼՂՀ ՊԲ-ն օրերս տեղեկացրեց, որ զինադադարից ի վեր առաջին անգամ Ադրբեջանը տանկեր է օգտագործել:

Նախորդ հանդիպման ժամանակ այլ էր աշխարհաքաղաքական իրավիճակը: Ռուսատանի շնորհիվ տարածաշրջանում մեծացել էր Թուրքիայի դերը, ընդհուպ այն աստիճան, որ պարբերաբար Թուրքիան փորձում էր իր քիթը մտցնել Ղարաբաղյան խնդրի մեջ: Հիմա նոր իրավիճակ է տարածաշրջանում, մեր քթի տակ նոր սահմաններ են գծվում, երկրներ են քանդվում ու ստեղծվում:Թուրքիայում ռուսական ինքնաթիռի խոցումից հետո էլ քանդվեց ռուս-թուրքական դաշինքը, ռուսներն էլ կարծես թե համոզվում են, որ պետք չէ զինել Ադրբեջանին: Միաժամանակ այս ընթացքում Միացյալ Նահանգներն է փորձում Կովկասում ակտիվ դերակատար լինել: Նրանց կողմից որպես համանախագահող երկրի,առաջարկ է արվել տեխնիկական միջոցներով սահմանը վերահսկել և ԵԱՀԿ դիտորդների թիվն ավելացնել: Միևնույն ժամանակ ակնհայտ փոփոխության է ենթարկվել ԱՄՆ տեսակետը Հարավային Կովկասի վերաբերյալ, արդեն որշակիացվում է Ադրբեջանի վերնախավի նկատմամբ պատժամիջոցների կիրառումը:

Այնպես որ, Սարգսյանն ու Ալիևը հանդիպում են այս անգամ նաև համանախագահող երկրների համար շատ կարևոր ժամանակաշրջանում և դժվար չէ կռահել, որ այս հանդիպման արդյունքների վրա լուրջ ազդեցություն կարող են ունենալ համանախագահող երկրները իրենց կովկասյան շահերով,մասնավորապես ԱՄՆ-ն ու Ռուսաստանը: