Խորհուրդ կտամ հետաքննություն սկսի, թե ինչպես ստացվեց, որ Փաշինյանը երկու գերշքեղ և գերթանկարժեք «Մերսեդես» գնեց իրենց սպասարկելու համար. Մամիջանյանը՝ Իոնիսյանին

Երբ որ այդ ամեն ինչը նոր սկսեց, առաջին միտքն այն էր, որ դա օլիգարխ-պատգամավոր Խաչատուր Սուքիասյանի՝ հետագայում դատարանում սպասվելիք պարտությունը մեղմելուն էր ուղղված, իսկ ես հիշեցնեմ, որ Սուքիասյանն ասում էր՝ Սերժ Սարգսյանը խաղատուն է հաճախել, ոչ թե առհասարակ Բադեն-Բադենի մասին էր խոսքը: Այս մասին  խորհրդարանական խմբակցությունների ճեպազրույցի ժամանակ ասաց «Պատիվ ունեմ» խմբակցության պատգամավոր Հայկ Մամիջանյանը` անդրադառնալով Սերժ Սարգսյանի՝ 2016 թ. ապրիլի 5-ին Բադեն-Բադեն մեկնելու մասին տեղեկություններին:

«Հաշվի առելով, որ օլիգարխ-պատգամավորի՝ նախկինում տեքստեր գրող, դեղին մամուլով հերքումներ և նորություններ տպող անձնավորությունն այս պահին զբաղեցնում է ԱԺ նախագահի պաշտոնը, հավանաբար ժամանակ էր պետք շահել, որպեսզի հիշյալ օլիգարխը ներողության տեքստը պատրաստի: Երբ որ ֆեյսբուքյան ֆեյքերը, ֆեյք քաղաքագետները միացան պայքարին, ես հասկացա, որ խոսքը մեր երկրի առաջ ծառացած խնդիրներից ուշադրութունը շեղելու համար է, բայց երբ որ օրվա ավարտին արշավին միացան նիկոլական քարոզչամեքենայի այնպիսի ականավոր գործիչներ, ինչպիսիք են «Ազատությունը» և Հ1-ը (ի դեպ, իրենց երկուսից էլ ակնկալում եմ, որ առնվազն նույնքան ժամանակ կլուսաբանեն հերքումը, ինչքան որ լուսաբանել են կեղծիքը), ես հասկացա որ մենք ունենք հիմնավոր կասկածի իրավունք, որ պատրաստվում է ինչ-որ հերթական հակահայկական կապիտուլյացիայի մի նոր փուլ ենթադրող փաստաթղթի ստորագրում կամ պայմանավորվածություն, ինչի մասին ավեlի ուշ նյութ եղավ Հրապարակում, որը վերաբերում էր այսպես կոչված խաղաղության համաձայնագրին, որը պատերազմից բացի ոչինչ չի բերի մեր երկրին»,- ասաց Մամիջանյանը: 

Նա անդրադարձավ նաև Սերժ Սարգսյանի հրապարակման հեղինակին՝ Դանիել Իոնիսյանին և խորհուրդ տվեց հետաքննել Փաշինյանի անցան հետ կապվող հարցրեր: 

«Չեմ կարող չհիշատակել այս ողջ արշավի «ճարտարապետին»՝ Սորոսից գրանտներ վաստակող Դանիել Իոնիսյանին, որը մեր երկրում ամեն ինչի մասնագետ է: Եվ եթե պարոն Իոնիսյանն այդքան սիրահար է հետաքննությունների, ես իրեն խորհուրդ կտամ, օրինակ, հետաքննություն սկսի, թե ինչպես ստացվեց, որ վարչապետի աթոռը զբաղեցնող անձը երկու գերշքեղ և գերթանկարժեք «Մերսեդես» գնեց իրենց սպասարկելու համար, այդ ինչպե՞ս ստացվեց, որ Սերժ Սարգսյանի՝ պետության կողմից տրամադրված առանձնատունը բավարար վերանորոգված չէր իր համար և ահռելի գումարներ ծախսեցին բյուջեից դրա վերանորոգման համար: Թող ձեռքի հետ ՀՔԾ դիմի նաև այն բանի համար, որ քարոզարշավի ժամանակ վարչապետի աթոռը զբաղեցնող անձը Սյունիք մեկնում էր 40-50 մեքենաներից բաղկացած շարասյունով: Բայց մենք այս ամենը չենք տեսնեի, քանի որ պարոն Իոնիսյանը հակված չէ իրականությունը գտնելու, այլ հակված է իր, որպես կանոն, հակահայկական օրակարգը առաջ տանելու»,- եզրափակեց Մամիջանյանը: