«Ոչինչ չի մոռացվում». Ռուսաստանի «վրեժը» Հայաստանից

Exclusive.am-ը գրում է.
 
Երեկ Ռուսաստանի կողմից առանձնապես վստահություն չվայելող՝ ՀՀ Անվտանգության խորհրդի քարտուղար Արմեն Գրիգորյանը մասնակցում էր ՀԱՊԿ Արտաքին գործերի նախարարների, Պաշտպանության նախարարների և ԱԽ քարտուղարների համատեղ նիստին: Ռուսական «Առաջին ալիքի» հրապարակած կադրերում տեսնում ենք, որ Հայաստանի դրոշը շրջված է դրվել Արմեն Գրիգորյանի դիմաց:

Քաղաքականության մեջ ոչինչ հենց այնպես չի լինում, հատկապես երբ խոսքը գերտերությունների իմիջին է վերաբերում: 

Մասնավորապես, երեկ Հայաստանը վերոհիշյալ նիստին մասնակցում էր խղճուկ «կազմով», եթե իհարկե միայն Գրիգորյանին կարելի է կազմ ասել: Եթե Պաշտպանության նախարար Արշակ Կարապետյանի բացակայությունը ինչ-որ կերպ հասկանալ կարելի է, ապա ժամանակին Հայաստանում Ռուսաստանի դեսպանատան դիմաց բողոքի ակցիա արած, Ռուսաստանի դրոշն այրողների կողքին կանգնած Արարատ Միրզոյանի բացակայությունն առնվազն վերաբերմունք էր առ կառույց, առ ՀԱՊԿ և առաջին հերթին, իհարկե, առ Ռուսաստան: Վատ վերաբերմունք:

Պատճառաբանությունից, թե օդանավի անսարքության պատճառով է, որ Միրզոյանը չի մեկնել Ռուսաստան, ինչպես ասում են, նույնիսկ եփած հավի ծիծաղն է գալիս, հատկապես որ արդեն այսօր Միրզոյանը Փաշինյանի կողքին վստահորեն նստած է Դուշանբեում:

Եվ ահա այս վերաբերմունքը Ռուսաստանը որևէ պարագայում «մարսել» չէր կարող: Եվ թերևս այդ է պատճառը, որ Հայաստանի սիմվոլ եռագույնը Արմեն Գրիգորյանի առջև «թարս էր բուսնել»: 

Իսկ ինչո՞ւ էր ընտրվել հենց դրոշի միջոցով Հայաստանից այսպես ասած «վրեժ լուծելու» տարբերակը:

Ընթերցողները հիշում են, որ երբ ԶՈւ ԳՇ պետ, գեներալ-լեյտենանտ Արտակ Դավթյանը հանդիպել էր այն ժամանակ ՌԴ խաղաղապահ զորախմբի հրամանատար, գեներալ-լեյտենանտ Ռուստամ Մուրադովի հետ, վերջինիս առջև ՌԴ դրոշը մերոնք շրջված էին դրել, դեռ բավարար չէ, մի բան էլ այդ լուսանկարներով էին հաղորդագրություն տարածել: 

Ռուսաստանի այս աննշան թվացող, բայց իրականում լայն տողատակ ունեցող քայլը պատասխան էր հայկական կողմին, գուցեև նաև ակնարկ, թե ոչինչ չի մոռացվում, ոչ ոք չի մոռացվում, և բոլոր հակառուսական քայլերի ու հայտարարությունների պատասխանը հայկական կողմը վաղ թե ուշ ստանալու է: 