Թեստավորման պահանջը կարող էինք դնել 5 օրը մեկ, 3 օրը մեկ, օրը մեկ, բայց վերցրել ենք ռացիոնալ ինկուբացիոն շրջանի մի թիվ՝ 14 օր․ Անահիտ Ավանեսյան (տեսանյութ)

Կորոնավիրուսի դելտա շտամով պայմանավորված՝ մենք ունենք մահերի և ծանր ընթացքի համամասնության մեծացում: Այս մասին այսօր՝ սեպտեմբերի 16-ին, կառավարության նիստում ասաց Առողջապահության նախարար Անահիտ Ավանեսյանը:

Նա նկատեց, որ օրինակ, երբ նախորդ տարի լինում էր 764 դրական դեպք, հոսպիտալացման տոկոսը շատ ավելի նվազ էր, քան հիմա է:

«Սա նշանակում է, որ մեր մահճակալային ֆոնդն ավելի արագ է սպառվում: Այս պահին ծավալված է 2044 մահճակալ, որից զբաղված է 1860-ը: Միայն վերակենդանացման բաժանմունքի մահճակալների թիվը 319-ից զբաղված է 289-ը»,- ասաց Ավանեսյանը՝ հավելելով, որ սա ամբողջ աշխարհում նկատվող տենդենց է։

Նախարարը շեշտեց նաև, որ հիվանդանոցային զբաղվածության 97-98 տոկոսը կազմում են այն քաղաքացիները, որոնք պատվաստված չեն կամ ամբողջական պատվաստումը չեն ստացել։

Նախարարի խոսքով՝ այն երկրներում, որտեղ պատվաստումների մակարդակը բարձր է, նկատելի է հիվանդացության աճ, բայց հոսպիտալացման և մահճակալային ֆոնդի ծանրաբեռնվածության առումով անհամեմատելի դրական է նախորդ տարվա համեմատ:

Ավանեսյանը նկատեց նաև, որ առջևում աշուն է և աշնան հետ հիվանդությունների աճ է նկատվում, սրվում են խրոնիկ հիվանդությունները։

Նա նախազգուշացնում է, որ այդ մարդկանց բուժսպասարկումը դժվար կլինի, եթե մարդիկ չպատվաստվեն ու դրանով նպաստեն վարակի տարածմանը։ Ավանեսյանը նաև նշեց, որ բուժաշխատողները ևս հոգնել են գերծանրաբեռնվածությունից և հորդորեց նրանց բեռը էլ ավելի չծանրացնել։

«Հոկտեմբերի մեկից, այո՛, պատվաստման պահանջը ուժի մեջ է մտնում։ Մենք պետք է զսպենք վարակի տարածումը։ 14 օրը մեկ թեստավորման պահանջը ևս ուժի մեջ է մտնում։ Կարող էինք դնել 5 օրը մեկ, 3 օրը մեկ, օր ու մեջ, բայց 14 օրը վերցրել ենք ռացիոնալ ինկուբացիոն շրջանի թիվ»,-ասաց նա:

Նա նշեց նաև, թե ովքեր են բացառություն կազմում․ հղիները, պատվաստվածները և հակացուցված հիվանդություն ունեցող քաղաքացիները։

Մանրամասները՝ տեսանյութում