Փաշինյանին հետաքրքրում է Իշխան Զաքարյանի թանկարժեք առանձնատան ծագումնաբանությունը

Այսօր Ազգային ժողովը քննարկում է ՀՀ Վերահսկիչ պալատի 2014թ. տարեկան հաշվետվությունը: ՀՀ Վերահսկիչ պալատի նախագահ Իշխան Զաքարյանը ներկայացրեց իրականացված վերահսկողության արդյունքները 11 ոլորտներում: Ի. Զաքարյանի ներկայացրած ոլորտներն են՝ ներդրումային միջավայրը, ֆինանսները, հանրային ծառայությունների կարգավորումը, կրթությունը, առողջապահությունը, գյուղատնտեսությունը, քաղաքաշինությունը, ճանապարհաշինությունը, տեղական և տարածքային ինքնակառավարումը, ընդերքի օգտագործումը, անշարժ գույքի պետական գրանցումը:

ԱԺ ՀԱԿ խմբակացության պատգամավոր Նիկոլ Փաշինյանը հարց ուղղեց բանախոսին, մասնավորապես հետաքրքրվելով, «Ձեր մի քանի միլիոն դոլար արժողությամբ առանձնատան ծագումնաբանությունը, որովհետև դա կարևոր է Ձեր գործունեության վստահելիության աստիճանը գնահատելու համար»:

Ն. Փաշինյանը շարունակեց նաև, որ 2013 թվականի հարցազրույցներից մեկում Ի.Զաքարյանը բացատրել է, որ նշված տան համար անրաժեշտ գումարները տրամադրել է սփյուռքահայ գործարար Ալբերտ Բոյաջյանը, իսկ վերջինս ավելի վաղ նշել է, որ այդ գումարները տրամադրել է իր համար տուն կառուցելու համար:

«Կարո՞ղ եք ասել, թե ինչպես է ստացվել, որ մարդը Ձեզ փող է ուղարկել իր համար տուն կառուցելու համար, սակայն Դուք տունը կառուցել եք Ձեզ համար»,- հետաքրքրվեց Ն.Փաշինյանը: –

«Ալբերտ Բոյաջյանը հաճախակի լինում է Հայաստանում և եթե ցանկություն կա, մի օր ես կարող եմ հանգիստ կազմակերպել, որ ինքը այդ ամենի մասին շատ ուղիղ խոսի և ասի»,- պատասխանեց Զաքարյանը:

«Ալբերտ Բոյաջյանը պարտավոր չի իմ հարցերին պատասխանել, Դուք պարտավոր եք իմ հարցերին պատասխանել: Եթե այն ինչ այստեղ գրված է` ճիշտ է, ապա նշանակում է, որ մարդը գումար է ուղարկել Ձեզ, որ իր համար տուն կառուցեք: Մի անգամ պատասխանեք, հասկանանք, անցնենք առաջ»,-ասաց Ն. Փաշինյանը:

Սակայն Իշխան Զաքարյանը մեկ անգամ ևս կրկնեց, որ Ալբերտ Բոյաջյանը հստակ ասել է, թե ինչի համար է տրամադրվում այդ գումարները: