Ես դեմ եմ հրապարակավ քննարկել մարտական գործողությունների ընթացքը. Սեյրան Օհանյանը դիմեց ՊՆ-ին, ԱԱԾ-ին և ԶԼՄ-ներին

Սրանք, կարծում եմ, որ մանիպուլյացիոն քայլեր են, որովհետև պատերազմի ժամանակահատվածում ես ուղիղ 40 օր եղել եմ Արցախում և տեղում լինելով, որևիցե մի կետում, այդ թվում՝ Ստեփանակերտում, չեմ լսել, չեմ տեղեկացել, որ, ասենք, այդպիսի անձինք կան կամ այդպիսի անձանց բռնել են: Այս մասին այսօր Ազգային ժողովում լրագրողների հետ զրույցում ասաց Պաշտպանության նախկին նախարար, «Հայաստան» դաշինքի պատգամավոր Սեյրան Օհանյանը՝ անդրադառնալով Նիկոլ Փաշինյանի այն հայտարարութանը, ըստ որի՝ կան դավաճաններ, ովքեր ասել են, որ հողերը վաճառված են և պետք չէ կռվել:

«Եթե հայտարարողներն այդպիսի տեղեկություն ունեին, ուրեմն պետք է համապատասխան միջոցներ ձեռնարկվեին, համագործակցելով այսօրվա մեր դատաիրավական համակարգի հետ, որպեսզի այս մեկ տարվա ընթացքում իրենք կարողանային բացահայտել և տեսնել՝ ովքեր են դավաճանները: Համենայն դեպս, հարուցված քրգործեր կան, և այդ քրգործերի և՛ քանակը, և՛ շարունակական աշխատանքը բավականին երկար են տևում: Այդ ընթացքում, կարծում եմ, մեր իրավական համակարգը պատասխան կտա այդ հարցերին»,- ասաց Օհանյանը:

Նա անդրադարձավ նաև Արագածոտնի մարզպետի այն հայտարարությանը, թե՝ «մտնում էին Շուշի, գեներալներին խնդրում էի` կրակեք, ասում էին` չենք կարող»: Լրագրողները հետաքրքրվեցին՝ իշխանության ներկայացուցիչներն իրենից խորհուրդ հարցրե՞լ են:

«Ես 44 օրվա ընթացքում տարբեր տեղերում եմ եղել, և Արցախի իշխանությունների հետ համագործակցված խորհրդատվական աշխատանք եմ կատարել: Եվ այն, ինչ ասում է Արագածոտնի մարզպետը, պետք է հարցնել Արագածոտնի մարզպետից: Ես իր հետ չեմ հանդիպել, չնայած այլ մի քանի մարզպետերի հետ հանդիպել եմ: Պետք է ասեմ հետևյալը՝ ես դեմ եմ հրապարակավ քննարկել մարտական գործողությունների ընթացքը, հատկապես այն գործողությունների, որտեղ նշվում են տեղանուններ, զորքեր, զորքերի գործողություններ, առավել վատ է, երբ ցույց են տալիս ինչ-որ քարտեզներ, դրանք ռազմական գաղտնիքներ են, չնայած այդ գաղտնիքների մի մասն արդեն վերհանված են, բայց այդ ամեն ինչի վերլուծությունը պետք է Պաշտպանության նախարարությունն իրականացնի, որովհետև ՊՆ-ի կարողությունների, նրա գործողությունների, մարտավարության, ռազմավարության մասին համապատասխան եզրակացություն կարող է կազմել նաև հակառակորդը: Ես դեմ եմ այդպիսի քննարկումներին, խորհուրդ եմ տալիս և՛ ՊՆ-ի և՛ ԱԱԾ ղեկավարությանը՝ համապատասխան միջոցներ ձեռնարկեն և նաև խնդրում եմ մեր ԶԼՄ-ներին պահպանել այդ ռազմական գաղտնիքը և ռազմական էթիկետի նորմերը»,- ասաց Օհանյանը: