Իշխանություններն ավելի լավ է լռեն, որովհետև այն, ինչ ասում են նրանք՝ դրա տակից պետք է հետո ազգովի դուրս գանք․ Հայկ Մամիջանյանը՝ Աղաջանյանի հայտարարության մասին

Իշխանության ներկայացուցիչների արձագանքներն ավելի լավ էր չլինեին։ 

Այս մասին լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Հայկ Մամիջանյանը և մանրամասնեց, որ ԱԺ արտաքին կապերի հանձնաժողովի նախագահն ասում է, որ վիճելի տարածքներն Ադրբեջանինն են, դրանով խոցելի են դարձնում երկիրը, որի տակից ոչ թե իշխանությունը, այլ ժողովուրդն է դուրս գալու։

«Այն, ինչ ասում են իշխանությունները, դրա տակից պետք է հետո ազգովի, երկրով դուրս գանք։ Եթե ԱԺ արտաքին կապերի հանձնաժողովի նախագահը հայտարարություն է անում, որ այդ տարածքները գտնվել են Խորհրդային Ադրբեջանի տարածքում, ապա այդ արձագանքն ավելի լավ է չլինի, որովհետև էն ինչ-որ իրենք ասում են, մասնավորապես՝ Աղաջանյան Էդուարդը, հետագայում ավելի շատ վնասելու է մեր երկրին։ Իրենք դա կամ չեն հասկանում, կամ հասկանալով են անում»,-ասաց Հայկ Մամիջանյանը։

Բացի այդ, նա նկատում է, որ ԱԱԾ-ն տարածում է հաղորդագրություն, որտեղ ադրբեջանական անվանումներ է օգտագործում, ինչպես երկրի վարչապետի աթոռը զբաղեցնողը։ Պատգամավորի գնահատմամբ՝ ԱԱԾ-ի այդ հայտարարության պարզաբանումն ավելի վատ էր, քան բուն հայտարարությունը։

«Ասում են՝ մենք դա ասել ենք, որ Հայաստանի բնակչությունը չմտածի, որ խոսքը հայկական տարածքների մասին է։ Նախ այո՛, դրանք հայկական տարածքներ են, և հետո՝ նման արձագանքներն ադրբեջանցիներին թույլ կտան ավելի լկտիանալ իրենց գործողություններում»,-նկատում է պատգամավորը։

Նա նաև նշում է, որ եթե մինչ այս ասում էին, թե տարածքները հանձնել են գաղտնի պայմանններում՝ ինչ-որ պայմանագրեր ստորագրելով, ապա հիմա ակնհայտ է, որ հայկական տարածքները հանձնելու են՝ նմանատիպ բացահայտ հայտարարություններով ցույց տալով, որ այդ տարածքները պատկանում են թշնամուն։

«Բնակչությանը կանգնեցնում են փաստի առաջ»,-ասաց պատգամավորը։