ՀԷՑ-ում չեն կրճատում ` աշխատողին տեղափոխում են մեկ այլ, ավելի ցածր աշխատավարձով հաստիքի

ՀէՑ-ը գնելը բարեգործություն չէ: Այս մասին ռուսական ՌԲԿ-հեռուստաընկերության հարցազրույցում ասել է «Տաշիր» ընկերությունների հիմնադիր Սամվել Կարապետյանը:
Նա նշել է, որ ընկերությունը մոտ 220 մլն դոլարի պարտք է կուտակել, որի պատճառով ակտիվները վաճառվել են, որպեսզի մարեն գոյացած պարտքերը։

«Մենք ընկերությունը ստացել ենք շատ ծանր վիճակում։ Այն վնասով էր աշխատում, բայց կսկսի շահույթ բերել», -ասել է նա։

Թե կոնկրետ ինչ քայլեր կձեռնարկվեն` հարցազրույցում չի ասվում, սակայն հարկ է նկատել, որ ավելորդ ծախսերը կանխարգելելու համար Սամվել Կարապետյանն սկսել է կրճատումներից: Նա Եվգենի Բիբինին ազատելուց հետո ժողով է հրավիրել ու տեղեկացրել, որ կրճատումները շարունակվելու են:

Հիմք է ընդունվել այն, որ հաստիքացուցակներում կան բարձր աշխատավարձ ստացող այնպիսի անձինք, ովքեր որևէ գործառույթ չեն իրականացնում:

newspress.am-ի հետ զրույցում ՀէՑ-ի աշխատակիցները, ովքեր չցանկացան ներկայանալ, հաստատեցին, որ այո’, կրճատումներ կան, սակայն ղեկավար կազմի կրճատումները չեն նույնանում շարքային աշխատողների կրճատման հետ:

«Ղեկավար կազմում աշխատողներին մի մասնաճյուղից մեկն են տանում: Ասենք կանչում են, գործից ազատում մեկին, հետո հայտարարում, որ ազատեցին, բայց էդ նույն մարդուն տարել ա մի ուրիշ մասնաճյուղ` մի գործի նշանակել: Էդ մարդու հետ աշխատողները ասում են` ազատեց, էլ չեն ասում, թե տարել ա եսիմ որտեղ պաշտոն ա տվել»:

Գործը այլ ընթացք է ստացել շարքային աշխատողների հարցում: newspress.am-ի զրուցակիցը վստահեցնում է, որ իրեն ցանկացել են կրճատել, բայց դիմել է իր վերադասին և որոշումը չեղյալ է համարվել: Իսկ այս իր գործընկերների բախտն այնքան էլ չի բերել: Որոշներն արդեն չեն աշխատում:

«Իմ հետ աշխատողներից են ազատվել, հավաքարարներ են կրճատել, մասնաճյուղ ունենք` փակվել ա»,- պատմեց մեր զրուցակիցը, ում հավաստմամբ կրճատումների հարցում ղեկավար կազմը դիվանագիտական մոտեցում է ցուցաբերում:

«Տես հիմա, բաժինը փակեց, բայց աշխատողին չի ազատել: Տարել ա իրա հետ ընդհանրապես կապ չունեցող մի ուրիշ բաժին ու աշխատավարձը կրճատել ա: 130 հազար դրամից իջեցրել ա 80 հազար ա սարքել: Է’, տղամարդա, էդ 80 հազարով ո՞նց տուն պահի: Հիմա ուզում ա դիմում գրի ու գործից դուրս գա: Ես էլ ասում եմ, դեռ մի քիչ համբերի, կարող ա բան փոխվի: Բայց դե ինչ… Էսա դուրս կգա, հետո էլ կասեն դե մենք չենք կրճատել, ինքն ա իր կամքով ազատվել»,- ասաց զրուցակիցս:

Հաշվի առնելով ՀԷՑ-ում իրականացվող հաստիքային և աշխատավարձի կրճատումներով մտահոգված աշխատակիցները ահազանգը` newspress.am-ն հարցադրմամբ դիմեց «Հայաստանի էլեկտրական ցանցեր» ՓԲԸ:

Ի պատասխան հարցման` ընկերության մամուլի խոսնակ Նատալյա Սարջանյանը հայտնեց, որ հաստիքային, աշխատավարձի կրճատում տեղի չի ունեցել: Նրա պնդմամբ` խոսքը կառուցվածքային փոփոխությունների մասին է, որի արդյունքում որոշ աշխատակիցների ֆունկցիոնալ պարտականություններ փոխվել են, նրանք տեղափոխվել են մեկ հաստիքից մյուսը:

«Այսօր մենք աշխատում ենք կառավարման օպտիմալ սխեմայի մշակման վրա, որի արդյունքների մասին հնարավոր կլինի խոսել այն ավարտին հասցնելուց հետո»,- ասաց Սարջանյանը: