Անկախության տոնը կազմակերպելու է կառավարության սիրեցյալ «Դոմինո փրոդաքշն» ընկերությունը՝ ահռելի գումարով․ Hraparak․am

Hraparak․am-ը գրում է․ Հոկտեմբերին «Էրեբունի-Երեւան» ավանդական տոնակատարությունները չենք նշելու, որովհետեւ ազգը սիրտ չունի, բայց Անկախության տոն՝ սեպտեմբերի 21, ունենալու ենք։ Վարչապետը որոշել է, որ տոն պետք է։ Նա երեկ հայտարարեց, որ սեպտեմբերի 21-ին Երեւանի Հանրապետության հրապարակում տեղի է ունենալու մասշտաբային եւ գունագեղ տոնակատարություն, որն «առաջին հերթին նվիրված է լինելու Հայաստանի անկախության, անվտանգության, ինքնիշխանության եւ Արցախի համար իրենց կյանքը զոհած մեր նահատակների հիշատակին»։ Ահա այսպես, անկախության հերը գունագեղ ձեւով անիծելուց հետո գունագեղ ձեւով դրա տոնն ենք նշում։

Դե, իսկ «մասշտաբայինն» առաջին հերթին վերաբերում է ոչ թե նահատակներին հիշելու եղանակին, այլ՝ ծախսերին։ Որքա՞ն գումար է հատկացվելու սեպտեմբերի 21-ի միջոցառումների համար, ո՞ր կազմակերպությունն է կազմակերպելու տոնը։

«Հրապարակի» տեղեկություններով, անկախության տոնը նշելու համար բյուջեից հատկացվելու է 1 մլրդ դրամ՝ 2 մլն դոլար։ Որպեսզի պատկերացնենք, թե դա ինչ թիվ է, համեմատենք նախկին տարիների ծախսերի հետ․ 2018 թվականին անկախության 27-ամյակը նշելու համար ՀՀ պետբյուջեից ծախսվել է 84 մլն 775 հազար դրամ: Այն օգտագործվել է բեմերի, երաժշտական տեխնիկայի տեղադրման եւ սպասարկման համար:

Մոտավորապես նույնչափ գումար՝ 100 մլն դրամ էր հատկացվել անկախության հռչակման 25-րդ եւ 26-րդ տարեդարձների տոնական միջոցառումների համար։

Տարբերությունն ահռելի է։ Իսկ այդ տարիներին Հայաստանն անհամեմատ ավելի բարեկեցիկ երկիր էր, Արցախը մերն էր, տարբեր վարակներից չէինք մահանում, չունեինք օր-օրի աճող գներ եւ այլն։ 2 մլն դոլարը ծախսելու համար մրցույթ չի հայտարարվելու։ Գնումը կառավարությունը ձեւակերպել է որպես հրատապ եւ իրականացնում է մեկ անձից, այսինքն՝ առանց մրցույթի։ Այդ մեկ անձը կառավարության սիրեցյալ ընկերությունն է՝ «Դոմինո փրոդաքշն» ՍՊԸ-ն, որը Նիկոլ Փաշինյանի օրոք մեծ պատվերներ է ստանում։

Այս ընկերության սեփականատեր Աշոտ Առաքելյանը Փաշինյանի գլխավոր խորհրդական Արայիկ Հարությունյանի հետ մտերիմ ընկերական հարաբերություններ ունի, եւ հենց Արայիկ Հարությունյանն է ապահովում Աշոտ Առաքելյանի «պռախոդը» նոր իշխանության օրոք։ «Դոմինո փրոդաքշն»-ին 2018-2021թթ․ կառավարական պատվերներ են տրվել՝ Երեխաների պաշտպանության միջազգային օրվա միջոցառումներից մինչեւ բարձրտեխնոլոգիական արդյունաբերության նախարարության նախաձեռնություններ։ Նույնիսկ «Ականազերծման եւ փորձագիտական կենտրոն» ՊՈԱԿ-ից է այն կինո եւ տեսաֆիլմերի արտադրության պատվեր ստացել։ Հասկանալի չէ, թե ինչ արժանիքների համար է Աշոտ Առաքելյանն իրագործում այս բոլոր ծրագրերը, այն դեպքում, երբ տասնյակներով այլ նմանատիպ ընկերություններ կան, իսկ Առաքելյանինը հայտնի է միայն մասնագիտական շրջանակներին եւ միայն մեկ գործով՝ «Կիլիկիա. Առյուծների երկիր» պատմական ֆիլմաշարով։

Աշոտ Առաքելյանն իր վերելքը սկսել է Երեւանի քաղաքապետարանի լրատվական ծառայությունում, երբ քաղաքապետը Գագիկ Բեգլարյանն էր։ Նրա մասին խոսեցին 2008թ. նախագահական ընտրություններից առաջ, երբ քարոզչական հայտնի հոլովակի հում նյութի արտահոսք էր եղել, եւ բոլորը տեսան, թե ինչպես են Ալբերտ Ազարյանն ու Հրանտ Թոխատյանը հայհոյում Սերժ Սարգսյանին եւ Երվանդ Զախարյանին։

Այն ժամանակ ԶԼՄ-ները գրեցին, որ տեսանյութը նկարել է Առաքելյանը, եւ արտահոսքը կատարել է նկարահանող խումբը։ Այդ օրերին էր, որ 6-րդ վարչությունը հավաքեց բոլորին, ովքեր կարող էին առնչություն ունենալ հոլովակի հետ։ Աշոտ Առաքելյանը եւ էլի մարդիկ ազատվեցին աշխատանքից։ Առաքելյանն այդ իրադարձություններից հետո՝ 2009-ին, այլ անձանց հետ, այդ թվում՝ ֆրանսահայ Սեւակ Սերոբյանի, հիմնեց «Դոմինո վիդեո փրոդաքշն» ընկերությունը։ 2013 թվականին ընկերությունը տուգանվել է կեղծ տեղեկություններ հրապարակելու եւ անբարեխիղճ մրցակցության համար։ Մեզ հայտնի տեղեկությունները փորձեցինք ճշտել Աշոտ Առաքելյանից։ Որոշ տվյալներ նա հերքեց, մի մասը հաստատեց, մի մասից էլ տեղյակ չէր։ Օրինակ՝ չգիտեր, թե ինչ ընթացակարգով են իրեն ընտրել սեպտեմբերի 21-ի ծրագրի համար։

- Ճի՞շտ է, որ Ձեր կազմակերպությունն է անկախության օրվա միջոցառումներն իրականացնելու։

- Այո, ճիշտ է։

- Ի՞նչ գումարի մասին է խոսքը, ճի՞շտ է, որ 1 մլրդ դրամ է հատկացվում՝ 2 մլն դոլար, եւ մեկ անձից գնման ընթացակարգո

- Ոչ, ոչ, նման գումարի մասին չէ խոսքը, ոչ էլ մեկ անձից գնմ

Մանրամասները՝ սկզբնաղբյուրում։