Իմ երեխեքը խի՞ պիտի քուչեքը մնան. տեղահանված բնակիչների ակցիան` կառավարության մոտ (ֆոտո, վիդեո)

Ժողովուրդ, իմացեք, որ քաշաթաղցի, հադրուդցի ու շուշեցի չկա, բոլորս մի օրի մարդիկ ենք։ Այս կոչով հանդես եկան Արցախի 44-օրյա պատերազմի հետևանքով տեղահանված քաղաքացիները, ովքեր եկել էին կառավարության շենք մոտ որպես պահանջատեր։ Նրանք պահանջում են ապահովել իրենց տներով, քանի որ իրենց տները մնացել են թշնամուն, իսկ վարձով չեն կարողանում ապրել։

Պետությունը 68 հազար դրամ էր տալիս, այդ էլ արդեն չեն տրամադրում, ու տեղահանված քաղաքացիները կանգնել են խնդրի առաջ։

Այս քաղաքացիներից ունեցվածքի փաստաթղթեր են ուզում, որոնք նրանցից ոչ ոք իր հետ չի բերել, քանի որ շատ արագ են տեղահանվել ու շատերն անգամ դուրս է եկել տնից՝ ինչով կարող է։

Նրանք համաձայն են աշխատել ու ապրել, բայց զբաղվածության խնդիր ունեն և չեն կարողանում գոյատևել։ Շատերն աշխատանք ունեն, բայց կարգավիճակ չունենալու պատճառով կանգնում են տարբեր խնդիրների առաջ։

«Մեզ լրիվ ստրուկի տեղ են դրել։ Մենք ուզվոր չենք, մեր հասանելիքն ենք ուզում։ Թող մեզ տուն տան, աշխատանքով ապահովեն, իրենց 68 հազար դրամները չենք ուզում»,-ասաց ակցիայի մասնակիցներից մեկը։ 

Տեղահանված քաղաքացիները որոշեցին իրենց հաջորդ ակցիաները կազմակերպել օտարերկյա դեսպանատների մոտ՝ ցույց տալու համար, որ Հայաստանում իրենք տեղ չունեն և ապաստարան են խնդրում այլ երկրներից։

Մեկ այլ կին էլ նկատեց․ «Իմ երեխեքը խի պիտի քուչեքը մնան, մինչև երբ․․․»։