Հայաստանն իր երկինքը բացել է ադրբեջանական ավիացիայի համար (լուսանկար)

«Հայաստանը երկինքը բացել է ադրբեջանական ավիացիայի համար․ 30 տարվա ընթացքում առաջին անգամ ուղևորատար ինքնաթիռը ներքին թռիչք է կատարել Ադրբեջանում՝ Հայաստանի օդային տարածքով», այս մասին գրում է «Вестник Кавказа» կայքը՝ հղում անելով Flight Radar ռեսուրսի տվյալներին։

Նշվում է, որ «Թուրքական ավիաուղիներ» ընկերության «Boeing-737» ինքնաթիռը շաբաթ օրը՝ սեպտեմբերի 4-ին, իրականացրել է TK326 Գյանջա-Նախիջևա չվերթը, սակայն տեղեկատվությունը հայտնվել է այսօր:

Ինքնաթիռը Գյանջայից թռիչք է կատարել 9.57-ին (UTC 5.57) և վայրէջք կատարել Նախիջևանում 10.32-ին, թռիչքի ժամանակը՝ 35 րոպե:

Օդանավի երթուղին, ըստ «Flight Radar»-ի, անցել է Սևանա լճի ու Գեղարքունիքի մարզի վրայով։

«Вестник Кавказа»-ի ավագ վերլուծաբան Անդրեյ Պետրովը իր հոդվածում նշել է, որ Հայաստանի իշխանությունները կփորձեն երկինքը բացել հնարավորինս լուռ, առանց պաշտոնական հայտարարության, որպեսզի հնարավորինս քիչ քաղաքական խնդիրներ ունենան ինչպես Հայաստանի ընդդիմության այնպես էլ սփյուռքահայության հետ։