Հանրային ծառայողները պատվաստված չլինելու դեպքում կարող են կորցնել իրենց աշխատանքը. ԱՆ-ն նոր նախագիծ է մշակել

ՀՀ արդարադատության նախարարությունը շրջանառության մեջ է դրել նախագիծ, որով հանրային ծառայողները կամ հանրային պաշտոն զբաղեցնող անձինք կարող են աշխատանքից ազատվել պատվաստված չլինելու դեպքում։ Այս մասին գրում է Փաստինֆոն։

Նախագծով առաջարկվում է փոփոխություն իրականացնել «Հանրային ծառայության մասին» օրենքում, որով հանրային ծառայողին կամ հանրային պաշտոն զբաղեցնող անձին զբաղեցրած պաշտոնից ազատելու հիմքեր են սահմանվում։ Աշխատողն ինքը կարող է ընտրել և աշխատանքի վայրում ներկայացնել կա՛մ հետազոտության (կորոնավիրուսի թեստի) արդյունքը հավաստող փաստաթուղթը, կա՛մ պատվաստման սերտիֆիկատը, իսկ հակացուցումների դեպքում՝ բժշկական տեղեկանքը։

Նախարարությունն այս նախագծի անհրաժեշտությունը հիմնավորում է ՀՀ-ում հաստատված կորոնավիրուսային հիվանդության դեպքերի աճով։

Հիմնավորման մեջ նշվում է, որ հանրային իշխանության մարմիններում աշխատող անձինք իրականացնում են հանրության և պետության համար կարևոր նշանակություն ունեցող գործառույթներ, և այդ պարագայում նրանց կողմից վարակիչ հիվանդությամբ վարակվելը կարող է տևական ժամանակ խոչընդոտներ ստեղծել այդ գործառույթների պատշաճ իրականացման համար։

Նախագծի հեղինակները կարծում են՝ օրինագծի ընդունմամբ կապահովվի հանրային իշխանության մարմինների կողմից իրականացվող գործառույթների պատշաճ իրականացումը։