Բանակից միլիոնավոր դոլարներ թալանած Պատրոն Դավոն ազատության մեջ է, Սյունիքի՝ պատերազմին մասնակցած քաղաքապետերը՝ բանտում (ֆոտո)

Այսօր Արցախի անկախության օրն է, Արցախի, որից չնչին մաս է մնացել: Մնացել է, այո, տասնյակ տարիների թալանի, անուշադրության, բայց գլխավորապես ներկա իշխանությունների ապիկար քաղաքականության, ապաշնորհության և պարզապես սովորական դավաճանության հետևանքով: 

Արցախի ու Սյունիքի հողերը թշնամուն նվիրած իշխանությունը հոխորտում է, թե իրենք սրբության սրբոց են, այդ չար ու դավաճան նախկիններն էին, որ այնքան էին թալանել, որ իրենք չհասցրին բանակը զինել: Սրանում, իհարկե, ճշմարտություն կլիներ, եթե նորերը պատժեին նախկիններին, նրանցից պետությանը վերադարձնեին թալանածը և ամենակարևորը՝ հենց իրենք չզբաղվեին թալանով, ուշադրություն, նույն բանակի հաշվին:

Իսկ բանակն ինչպես նախկինում, այնպես էլ հեղափոխություն կոչվածից հետո թալանած գլխավոր դեմքը Պատրոն Դավոն է, նույն ինքը՝ Դավիթ Գալստյանը, ում մասին NEWSPRESS.am-ը մեկ անգամ չէ, որ գրել է: 

Արդեն կարող ենք վստահորեն պնդել, որ Գալստյանն է, որ Հայաստան է բերել հնամաշ զենքեր, վերանորոգել այն ու «սաղացրել» բանակի վրա: Դրանց համար պետությունը վճարել է 27 մլն դոլար, մինչդեռ դրանց իրական արժեքը եղել է ընդամենը 3,5 մլն դոլար: Ընթերցողի հիշողությունը թարմացնենք մի քանի լուսանկարով, թե ինչ վիճակով են Պատրոն Դավոյի ձեռամբ զենքերը ներկրվել Հայաստան: 

Բայց, իշխանությունն ու դրա գլխին կանգնած Փաշինյանի օգտագործման իրավապահները չտեսնելու տվեցին այս լուսանկարները և հրապարակումը և Հայաստանին 60-ականների զենքով զինող Պատրոն Դավիթով սկսեցին զբաղվել միայն այն ժամանակ, երբ պետք էր երկու ձմերուկ բռնել՝ պատերազմի պարտության հերթական մեղավոր նշանակել, որից հետո նաև «մաքրել» նրան:

Գալստյանին մեղադրանք է առաջադրվել 1 միլիոն 83 հազար դոլար հափշտակելու համար: Սա զավեշտալի է այնքանով, որ միայն մեկ գործարքից Պատրոն Դավոն իրենով է արել 23,5 մլն դոլար, էլ չենք խոսում այն մասին, որ փողեր է աշխատել նաև Թուրքիայի պաշտպանության նախարարությանը զենք վաճառելով՝ դրանք գնելով Ղազախստանից շատ ավելի մատչելի գներով:

Ինչպես և սպասվում էր, Պատրոն Դավոն ազատության մեջ է, փոխարենը՝ բանտում են մարդիկ, ովքեր 44-օրյա պատերազմի ժամանակ եղել են ամենաթեժ կետերում՝ պաշտպանելով Արցախը և գիտակցելով, որ հերթը Սյունիքինն է: Եվ ահա, Արցախը բզկտված է, հարվածներն էլ իր վրա է վերցնում Սյունիքը, որը մնացել է առանց քաղաքապետերի: Սյունյաց 4 քաղաքապետերին շատ ավելի զվարճալի մեղադրանքներ են առաջադրված, քան Պատրոն Դավոյին, սակայն նա ազատության մեջ է, իսկ մյուսները՝ կալանավայրում: 

Չենք հերքում, որ կարող է պատահել այնպես, որ Պատրոն Դավոյի տղամարդկությունը թույլ չտվեց ընդդիմանալ Փաշինյանին ու նրա իրավապահներին, այնպես, ինչպես օրինակ Սյունիքի քաղաքապետերը: Օրինակ՝ Առուշ Առուշանյանն իր ու մյուս քաղաքապետերի դեմ ընթացող պրոցեսները «կապիկություն»էր որակել, իսկ դրա հեղինակներին՝ «կապիկներ»: Իսկ Դավոն հերթական հարմար տեղը փնտրող-գտնողն է, նրա համար կարևորը փող աշխատելն է, կլինի դա Նիկոլ Փաշինյանի ինչ-որ հատվածում հարմար տեղավորվելու, զինվորների կյանքի, թե թուրքերին զինելու գնով: 

NEWSPRESS.am