Նողկալի է, երբ Արցախը բզկտողը խոսում է պատմական պարտավորությունից, ազգային արժեքից ու Արցախը կերտելուց

Արցախի Հանրապետության տոնի առթիվ Արցախի 75%-ը թշնամուն նվիրելու գործում իր մասնակցությունն ունեցած, ու դեռևս Արցախի նախագահի պաշտոնն զբաղեցնող Արայիկ Հարությունյանը հանգիստ խղճով շնորհավորել է արցախցիներին․․․

Շնորհավորել է զուտ այն բանի համար, որ որպես նախագահ չէր կարող շրջանցել ու պետք է մի բան ասեր․․․ Բայց իր պաշտոնից ատամներով կառչած Հարությունյան Արայիկը Արցախի անկախության առթիվ ասելիք չուներ․․․ 

Այս հիշարժան օրը, ոչ միայն Արայիկ Հարությունյանի լեզուն չի պտտվել խոսել Արցախյան գոյամարտի, արցախյան հերոսների ու Արցախի հաղթանակների մասին, այլև նրա տեքստը անկեղծ չէր․․․

Նա ասել է, թե «ձեռքբերումներ ու կորուստներ ենք ունեցել»՝ անդառնալի կորուստներ․․․

Եթե Արայիկ Հարությունյանն անկեղծ լիներ՝ պետք է ասեր, որ այդ ձեռքբերումներն ունեցանք մեր հայրերի ու պապերի շնորհիվ, իսկ ինքը թույլ տվեց կորցնել նույն այդ հերոսների կյանքի գնով ստացած ձեռքբերումները․․․

Նա ասել է, թե «Մենք պատմական պարտավորություն ունենք՝ ապրել ու արարել մեր սեփական հայրենիքում, կերտել Արցախի Հանրապետությունը՝ առաջնորդվելով մեր ազգային արժեքներով․․․»․․․

Իհարկե լավ է ասել․․․ բայց հետաքրքիր է իմանալ՝ ինչպե՞ս է պատրաստվում կերտել Արցախի Հանրապետություն, երբ այդ պատմական պարտավորությունները ոտքի տակ տվեց, երբ Արցախը նաև իր մեղքով բզկտեցին ու մի պատառիկ թողեցին․․․

Ինչպե՞ս է նա պատկերացնում Արցախի Հանրապետությունը՝ ի՞նչ սահմաններով և ո՞ր ազգի ժողովրդով, երբ ադրբեջանցիները տիրացել են Արցախին, երբ անարգել ելումուտ են անում Արցախի մյուս՝ դեռ հայերի տիրապետության ներքո գտնվող տարածքներ ու փորձում են կոտրել անգամ Հայաստանի ողնաշարը․․․

Եվ ի՞նչ ազգային արժեքների մասին է խոսում Արայիկը, երբ արժեզրկեց ամեն ինչ․․․ Սա՞ էր մեր պատմական պարտավորությունը․․․

Տարիներ շարունակ այս օրերին, Արցախի անկախության օրվա առիթով, Ստեփանակերտ են այցելել ՀՀ առաջին դեմքերը՝ նախագահը, վարչապետն ու ԱԺ նախագահը, իսկ այսօր՝ նրանք դա էլ չեն արել․․․

Սրա պատճառը երկուսից մեկն է․

1․․․ կամ ՀՀ վերոհիշյալ պաշտոնյաները, վարչապետի գխավորությամբ, այլևս չեն ճանաչում Արցախի անկախությունը՝ հաշվի առնելով, որ Արցախը մի պատառիկ է մնացել

2․․․կամ նրանք, ու մասնավորապես Նիկոլ Փաշինյանը, բավարարել են Ադրբեջանի նախագահ Իլհամ Ալիևի պահանջները․․․

Ալիևը հոխորտացել էր, թե ՀՀ իշխանություններն անելիք չունեն Արցախում ու չպետք է համարձակվեն ոտք դնել այնտեղ․․․ նրանք էլ չգնացին․․․

Ամեն դեպքում այս ֆոնին Արայիկ Հարությունյանի «լավատեսությունն ու բարեմաղթանքները» պարզապես ծաղր են՝ իր իսկ հայրենակիցների ու ողջ հայության նկատմամբ, որը նողկանք է առաջացնում․․․

Արմինե Մկրտումյան