Հայրենիքի համար անմահացած հերոսների հիշատակը հարգելու և միշտ վառ պահելու միջոցը՝ նրանց կիսատ գործն անձնվիրաբար շարունակելն է. Արցախի ՆԳ նախարար

ԱՀ Ներքին գործերի նախարար Կարեն Սարգսյանն ուղերձ է հղել Արցախի անկախության օրվա առթիվ: Ուղերձում, մասնավորապես, ասված է.

«Սեպտեմբերի 2-ն Արցախի նորագույն պատմության մեջ եղել է և կմնա որպես փառավոր էջերից մեկը, երբ երկրի մի հատվածում պատերազմ էր, մյուսում` համաժողովրդական շարժման ալիքի տակ կազմակերպված հանրաքվե:

Սեպտեմբերի 2-ը պարզապես առիթ էր ինքներս մեզ ճանաչելու, մեր ինքնությունը հարգելու, մեր հնարավորություններն ու ներուժն ի մի բերելու:

Այսօր էլ մեր պայքարը շարունակվում է: Պատերազմից հետո նորից կհաջողենք՝ եթե յուրաքանչյուրս ավելի շատ սիրենք մեր երկիրը և ապրենք Արցախում՝ մշտամնա ցանկությամբ:

Այն իրականությունը որ ունենք 2020 թվականի պատերազմից հետո՝ պարտավոր ենք շենացնել: Շարունակենք աշխատել և արարել, մեր ստեղծարար միտքն ուղղենք նոր գաղափարներ կյանքի կոչելուն, հանուն մեր ընդհանուր նպատակների, հանուն մեր ազգային շահի ու հաղթանակած ապագայի՝ պարտավոր ենք լինել համախմբված ու միասին:

Ինչպես երկիրը, այնպես էլ մենք՝ հիմա առավել քան միմյանց հոգատարության կարիքն ունենք:

Արցախի անկախության ու կայուն խաղաղության համար նահատակվեցին մեր լավագույն տղաները: Խոնարհվում եմ հերոսների ու նրանց ծնողների առաջ: Հայրենիքի համար անմահացած հերոսների հիշատակը հարգելու և միշտ վառ պահելու միջոցը՝ նրանց կիսատ գործն անձնվիրաբար շարունակելն է:

Հարգանքով՝ ԱՀ ՆԳ նախարար Կարեն Սարգսյան»: