Հովիկ Աբրահամյանի անձնական բյուջեն

Նոր Սահմանադրությունը դեռ չմարսած արդեն տպաքանակի հարցերն ենք լուծում: Կառավարությունը որոշում է կայացրել պետական բյուջեի պահուստային ֆոնդից 33 միլիոն դրամ հատկացնել ՀՀ Սահմանադրությանը` 100000 օրինակով հրապարակելու նպատակով: Հետագայում այդ օրինակները պետք է բաժանվեն պետական հիմնարկներին: Մինչդեռ ընտրություններից առաջ, երբ իրականում ընտրողը պետք է ծանոթանար սահմանադրության փոփոխություններին որևէ մեկի մտքով չանցավ գոնե սահմանադրության փոփոխության քսերոքսը բաժանել, փոխարենը հորդորում էին փոփոխությունները կարդալ համացանցում: Ինչու հիմա նույնը չեն հորդորում պետական հիմնարկներին, ինչու հանկարծ կառավարությունում ծնվեց այս մեծ ուշադրությունը արդեն ընտրված սահմանադրության հանդեպ: Դեռ լավ է, որ չեն որոշել տպել պապիրուսների վրա, որ եգիպտացիները մի 5000 տարի հետո հայտնաբերեն:

Իհարկե զավեշտալի է այս որոշումը, հատկապես 2016 թ-ի բյուջեի, երկրի սոցիալ տնտեսական վիճակի և համատարած աղքատության համատեքստում: Օրեր առաջ մամուլը հրապարակեց ցավալի մի լուր, երբ ազատամարտիկը ցրտից իր բնակարանում մահացել է: Եվ ուրեմն քանի գրոշ արժի այն սահմանադրությունը, լավ կամ վատ, երբ մարդը գերագույն արժեք չէ, նույնիսկ եթե այն տպագրվի 200000 օրինակով: Մի տեսակ տպավորություն է, որ կառավարության բյուջեն իր պահուստային ֆոնդով դարձել է Հովիկ Աբրահամյանի անձնական բյուջեն, ինչպես ուզում` այնպես տնօրինում է, և ինչպես ուզում` այնպես կազմում է հաջորդ տարվա բյուջեն: