Ստացվում է՝ ինչ կբերի կառավարությունը՝ կքվեարկեք այո, բայց միանձնյա կառավարումը միշտ վտանգավոր է. Օհանյան (տեսանյութ)

Կառավարության ծրագիրը տպավորություն է ուզում ստեղծել, թե նախորդ 3 տարիներին, ոչինչ չի եղել, չեն փոխել մեր պետության սահմանները, չի զոհվել մի ողջ սերունդ, չեն առաջացել խնդիրներ մեր երկրի համար: Այս մասին Ազգային ժողովի նիստում հայտարարեց «Հայաստան» խմբակցության ղեկավար Սեյրան Օհանյանը։

«Կառավարության ծրագիրը ոչ ամբողջությամբ չի համապատասխանում պետության խնդիրներին։ Մանավանդ ռիսկերի վտանգների և ծրագրերի բովանդակության այդ անհամապատասխանությունը հիմնական և գլխավոր թերությունն է։ Չկա ռազմաքաղաքական իրավիճակի հստակ գնահատական։ Անվտանգության միջվայրի փխրունությունը և սպառնալիքները, Թուրքիայի՝ Հարավային Կովկաս մտնելը չի ստիպել պաշտպանական ռազմավարական վերանայում կատարել և ունենալ Զինված ուժերի բարեփոխումների ծրագիր։ Օրինակ՝ առկայության ժամկետի նվազեցումը ոչ ժամանակին և պոպուլիստական քայլ է»,- նշեց նա։

Սեյրան Օհանյանի խոսքով՝ ծրագիրը չի համապատասխանում Հայաստանի և Արցախի առջև կանգնած և ահագնացնող անորոշություններին։

«Մենք մերժում ենք պարտվողի հոգեբանությունը, Ադրբեջանի հետ ժամանակավրեպ և առանց հիմքերի խաղաղության խաբկանքի մեջ մտնելը։ Այս պահին Հայաստանի շրջափակումը Արցախի և Հայաստանի համար բերելու է խորը շրջափակման»,- ասաց պատգամավորը։

Ըստ Սեյրան Օհանյանի՝ անհիմն են իշխանության կողմից հնչող քննադատությունները, որ կառավարության ծրագրի նկատմամբ ընդդիմությունը կառուցողական չէ։

«Ստացվում է, որ ինչ կբերի կառավարությունը՝ կքվեարկեք. դա այդպես է, բայց ուզում եմ հիշեցնել, որ միանձնյա կառավարումն ու մեծամասնական իշխանությունը խորհրդարանում միշտ վտանգավոր է»,- ասաց Սեյրան Օհանյանը։

Մանրամասները՝ տեսանյութում