1 աշխատողը 1 ժամում ստեղծում է միջինը 6.8 դոլար արդյունք. Փաշինյան

ՀՀ վարչապետ Նիկոլ Փաշինյանը ներկայացնելով ՀՀ կառավարության 2021-26թթ.–ի գործունեության ծրագրի տնտեսական հատվածը, նշեց, որ Հայաստանում 1 աշխատողը 1 ժամում ստեղծում է միջինը 6.8 դոլար արդյունք։ 

Վարչապետի խոսքով՝ սա շատ վատ ցուցանիշ է։ ՌԴ-ում նույն արտադրողականության ցուցանիշը կազմում է 11.7, ԵՄ–ի միջին ցուցանիշը` 42.7 դոլար։ ԵՄ երկրներ կան, որտեղ արտադրողականության ցուցանիշը ավել է 100 դոլարից։

«Ես կարծում եմ, որ այս ցուցանիշն ի ցույց է դնում տնտեսության ոլորտում մեր ունեցած ամենակարևոր բազային խնդիրներից մեկը: Հայաստանի ՀՆԱ-ում գյուղատնտեսությունն ավելի մեծ կշիռ ունի, մինչդեռ այդ ոլորտում արտադրողականության ցուցանիշը շատ ավելի ցածր է` ժամում 3 դոլար»,-նշեց վարչապետը և հավելեց. «Մեր քաղաքացիներն ասում են` առավոտից երեկո աշխատում ենք, բայց մեր աշխատանքի արդյունքը չենք տեսնում։ Այ, էս նախադասությունը, եթե փորձենք վերաձևակերպել բանաձևի, դա աշխատանքի արտադրողականությունն է։ Ինչի՞ է, որ մենք առավոտից երեկո չարչարվում ենք, բայց բարեկեցություն դրա արդյունքում չի ստեղծվում, որովհետև մեր աշխատանքի արտադրողականությունը չափազանց ցածր է»։