Ընդդիմությունը բոյկոտեց անդրանիկ նիստը. նրանք նիստին եկել էին «քաղբանտարկյալներ» գրությամբ սպիտակ շապիկներով

Ազգային ժողովում սկսվեց 8֊րդ գումարման առաջին նիստւ։ Խորհրդարանական ընդդիմության ներկայացուցիչները նիստին եկել էին սպիտակ շապիկներով, որոնց վրա իրենց կուսակից ընկերների սև֊սպիտակ լուսանկարներն են՝ «քաղբանտարկյալներ» գրությամբ:

 «Հայաստան» դաշինքի պատգամավոր Արմեն Ռուստամյանը՝ անդրադառնալով դաշինքի անդամներ Արթուր Սարգսյանի և Մխիթար Զաքարյանի՝ կալանքի տակ գտնվելուն, նկատեց, որ արտառոց վիճակում են։

«Չի եղել ԱԺ այսպիսի գումարում, որ սկսենք, երբ երկու պատգամավոր գործընկերներ գտնվում են կալանքի տակ, ազատությունից զրկված, իրենց կամքին հակառակ չեն կարողանում մասնակցել ԱԺ նիստերին, լիարժեք իրականացնել իրենց լիազորությունները»,֊ ասաց Ռուստամյանը։

Նա ընդգծեց՝ ԱԺ մարմինները, ղեկավարությունը այսօր պետք է ձևավորվի, և այդ պատգամավորները ոչ ընտրելու, ոչ ընտրվելու իրավունք այսօր չեն ունենա, եթե ներկա չլինեն ԱԺ դահլիճում։

«Եթե մենք համարում ենք, որ ոչինչ չի եղել, այսպես հանգիստ կարելի է սկսել, անցնել օրակարգին ու անտեսել այս ամենը, ապա այս սկզբով մենք լավ տեղ չենք հասնի։ Մենք իրավունք չունենք կանոնակարգի կոպիտ ոտնահարմամբ, խախտումով գնալ առաջ։ Մեր աչքի առաջ ամենաթողություն է տեղի ունեցել։ Անձեռնմխելիությունը շրջանցելով, ԱԺ-ն անտեսելով՝ մեր երկու պատգամավորները գտնվում են կալանքի տակ։ Սա ոչ միայն ոտնձգություն է այդ պատգամավորների լիազորությունների նկատմամբ, այլև անարգանք է ԱԺ-ի նկատմամբ»,-հայտարարեց նա։