Պարույր Սևակի բնակիչների գազի, էլէներգիայի և ոռոգման ջրի սակագինը պետությունը մասնակի կփոխհատուցի

Արարատի մարզի սահմանամերձ Պարույր Սևակ համայնքի բնակիչների գազի, էլէներգիայի և ոռոգման ջրի սակագինը մասնակի, իսկ գույքահարկի և հողի հարկը` ամբողջությամբ կփոխհատուցի պետությունը: Որոշումն այսօր ընդունվեց կառավարության նիստում, հարցը ներկայացրեց ՀՀ տարածքային կառավարման և արտակարգ իրավիճակների նախարարի տեղակալ Վաչե Տերտերյանը:

Նրա խոսքով` կառավարությունը 2015 թվականի սեպտեմբերի 1-ից մինչև դեկտեմբերի 31-ը ներառյալ ընկած ժամանակահատվածի համար նախատեսում է աջակցություն տրամադրել բաժանորդների սպառած գազի ծավալի (մինչև 30 խմ) 50 տոկոսի չափով, իսկ սպառած էլեկտրաէներգիայի ծախսի համար (մինչև 120 կվտ)՝ 50 տոկոսի չափով:

Փոխնախարարը նաև նշեց, որ այդ բաժանորդների համար «ՀԷՑ»-ի 2015թ-ի սեպտեմբերի 1-ից մինչև դեկտեմբերի 31-ը ներառյալ ընկած ժամանակահատվածի համար էլեկտրաէներգիայի ծախս ունեցող ամիսներին տրամադրվում է 15 խմ, տարվա ընթացքում աճողական մինչև 180 խմ բնական գազի քանակության արժեքին համապատասխան գումար: