Դատավոր «Ազարյանը բարոյական իրավունքներից զուրկ անձնավորություն է․․․»․ քաղաքացին անհարգալից վերաբերմունք է ցուցաբերել դատարանի նկատմամբ․ նրան մեղադրանք է առաջադրվել

Ռաֆիկ Հովհաննեսի Գևորգյանին մեղադրանք է առաջադրվել այն բանի համար, որ նա դատարանի նկատմամբ անհարգալից վերաբերմունք ցուցաբերելու դիտավորությամբ, 2021 թվականի ապրիլի 9-ին ԵԴ/0173/11/20 դատական գործով Երևան քաղաքի ընդհանուր իրավասության առաջին ատյանի դատարանի որոշման դեմ տարված վերաքննիչ բողոքի քննության շրջանակներում, ՀՀ Վերաքննիչ դատարան է մուտքագրել վերոնշյալ բողոքը քննության առնող նախագահող դատավոր Ալեքսանդր Ազարյանի դեմ «Բացարկ» վերտառությամբ ինքնաբացարկի միջնորդություն, որը քննության է առնվել և հրապարակվել է 2021 թվականի ապրիլի 23-ի դատական նիստի ժամանակ, դրանում ի թիվս այլնի նշել է, որ դատավոր Ալեքսանդր Ազարյանը «բարոյական իրավունքներից զուրկ, կոռուպցիայով դատավոր դարձած և կոռուպցիայով ղեկավարվող անձնավորություն է, որը իրավունք չունի իրեն վերաբերող գործ քննելու» արտահայտություններ՝ նման կերպ վիրավորելով ՀՀ Վերաքննիչ դատարանի դատավոր Ալեքսանդր Ազարյանին, վերջինիս պաշտոնեական լիազորությունների իրականացման առնչությամբ: Այս մասին NEWSPRESS.am-ը տեղեկանում է Դատական տեղեկատվական համակարգից։ 

Գևորգյանին մեղադրանք է առաջադրվել Քրեական օրենսգրքի 343-րդ հոդվածի 3-րդ մասով։ 

Նրա նկատմամբ խափանման միջոց է ընտրվել ստորագրությունը չհեռանալու մասին։ 

Գործը մակագրվել է Երևանի ընդհանուր իրավասության դատարանի դատավոր Արթուր Մկրտչյանին։