Դիմորդները կարող են բուհերի թափուր մնացած տեղերի համար դիմել և մրցույթի մասնակցել

Եթե տարիներ առաջ շատ դիմորդներ ընտրում էին տնտեսագիտությունը` մասնավորապես ֆինանսներ և վարկ, կառավարում, ապա այս տարի այդ բաժիններում նույնիսկ ամենացածր միավորներով ընդունվել են, այսինքն համարյա մրցույթ չի եղել։ Այս մասին լրագրողների հետ զրույցում հայտարարեց Գնահատման և թեստավորման կենտրոնի փոխտնօրեն Կարո Նասիբյանը։

Իսկ քանի որ թափուր տեղերի թիվը մեծ է, ուստի որոշվել է թույլ տալ դիմորդներին դիմել այդ տեղերի համար: Մինչև հուլիսի 26–ը ներառյալ դիմորդները կարող են բուհերի թափուր մնացած տեղերի համար դիմել և մասնակցել մրցույթի։ 

Նասիբյանի խոսքով` թափուր մնացած տեղերի թիվը մեծ է, որովհետև բացի պետական բուհերից` ընդգրկված են նաև ոչ պետական բուհերը. մոտավորապես կա 15.000 թափուր տեղ։

«Եթե դիմորդները այսօր ժամը 18.00–ից բացեն մեր dimord.am կայքը և փորձեն գտնել թափուր մնացած տեղերն ըստ մասնագիտությունների և ըստ բուհերի` կտեսնեն նաև ոչ պետական բուհերում թափուր մնացած տեղերը։ Այսօրվանից մինչև հուլիսի 26–ը ներառյալ, այն դիմորդները, որոնք դրական միավորներով դուրս են մնացել բուհ ընդունվելուց, կարող են նորից հայտագրվել»,–ասաց նա։

Դիմորդները կարող են ընտրել մինչև 6 մասնագիտություն, նշել տարբեր բուհեր, և այդ 6 մասնագիտություններում առավելությունը տրվելու է միավորին, այլ ոչ թե նրանց, ովքեր առաջինն են նշել այս կամ այն մասնագիտությունը։

Հուլիսի 26–ից հետո կազմակերպվելու է մրցույթը, իսկ հուլիսի 30–ին կհրապարակվի թափուր տեղերի համար մրցույթի արդյունքները։

Նա տեղեկացրչեց, որ միասնական քննություններին հայտագրված դիմորդների թիվը եղել է 11058, ընդունվածների թիվը` 8083։

«Մրցույթից դուրս մնացածների թիվը կազմել է 2935, որի մեջ մտնում են նաև նրանք, ովքեր կտրվել են քննությունից. 1546 դիմորդ։ Կտրվածների թիվը պետք է բաժանել 2 մասի, կան դիմորդներ, որոնք երկու քննություն են հանձնել, երկուսից էլ անբավարար են ստացել և կան դիմորդներ, որ հանձնել են 1 քննություն և անբավարար են ստացել։ Իսկ այն դիմորդները, որոնք երկու քննություններից մեկը բավարար են ստացել, կարող են մասնակցել թափուր մնացած տեղերի լրացուցիչ մրցույթին»,–ասաց Կարո Նասիբյանը։