Արդեն եվրոպացիներն են ահազանգում՝ Երերույքը վտանգված է

Հաագա և Լյուքսեմբուրգ քաղաքներում Եվրոպա Նոստրա եվրոպական ժառանգության առաջատար կազմակերպությունը և Եվրոպական ներդրումային բանկ ինստիտուտը հայտարարել են 14 հուշարձանների և տեսարժան վայրերի ցանկը, որոնք ընդգրկվել են 2016 թվականի «7 առավել վտանգված» հուշարձանների ծրագրում: Առավել վտանգված հուշարձանները և տեսարժան վայրերն ընտրված են եվրոպական 14 երկրներից, Հայաստանից ընդգրկված են Երերույք հնագիտական հուշարձանը և Անի-Պեմզա գյուղը:

Newspress.am-ի հետ զրույցում Հայաստանի ճարտարապետների միության նախագահ Մկրտիչ Մինասյանը իր դիտարկումները ներկայացրեց վտանգված եկեղեցիների խնդրի վերաբերյալ:

Ըստ նրա, Երերույքի եկեղեցին Հայաստանի հնագույն եկեղեցիներից է և լավ է պահպանված, գտնվում է սահմանամերձ գոտում:

Ճարտարապետը նշեց, որ Երերույքը բարդ հուշարձան է, վերականգնելը բավականին դժվար, քանի որ յուրաքանչյուր քարին պետք է զգուշորեն մոտենալ. եկեղեցին 4-րդ դարի է:

Նա նաև հաղորդեց, որ այժմ թե իտալացի, թե գերմանացի մասնագետներ են ուսումնասիրություններ կատարում Երերույքում. եկեղեցին երևի թե պետք է կոնսերվացվի:

«Հաշվի առնելով հուշարձանի կարևորությւոնը, պետք է այն պահպանվի անաղարտ վիճակում»,- ասաց Մկրտիչ Մինասյանը, հավելելով, որ եկեղեցու վրա ուշադրություն կա. Երերույքը պետք է պահպանվի նաև ժամանակակից մոտեցումներով:

Ինչ վերաբերում է Անի-Պեմզա գյուղին, ապա Մ. Մինասյանը նշեց, որ գյուղում վաղ միջնադարյան հուշարձաններ կան, որոնք ևս պահպանման կարիք ունեն. ինչքան հուշարձանը հին է, այնքան վերականգնելը բարդ ու դժվար: