«Հերթական անհեթեթ որոշման փորձը». Տիգրան Ներսիսյանը՝ երկու թատրոն միավորելու որոշման մասին

ՀՀ վաստակավոր արտիստ Տիգրան Ներսիսյանը Ֆեյսբուքյան էջում անդրադարձել է Հ․ Պարոնյանի անվան երաժշտական կոմեդիայի եւ Պետական կամերային երաժշտական թատրոնները միավորելու ՀՀ ԿԳՄՍ նախարարության նախաձեռնությանը։

«Հերթական անհեթեթ որոշման փորձը․

Երաժշտական Կամերային Թատրոնը պիտի ապրի իր տանը, իր ծածկի տակ։ Ոչ մի թատրոն՝ կայացած թատրոն, մեկ ուրիշ թատրոնի հետ նույն հարկի տակ ապրել, ստեղծագործել, պահպանել իր դիմագիծը, իր տեսակը չի կարող, մանավանդ երբ մեծ թատրոնի մեջ ուզում ես տեղավորել փոքր թատրոնը իր ամբողջ ստեղծագործական կազմով։ Այն պարզապես ժամանակի ընթացքում կտարալուծվի, կավարտվի, կվերջանա»,- նշել է դերասանը։

Տիգրան Ներսիսյանը հիշեցրել է «ՓՈՍԻ» էքսպերիմենտալ թատրոնի մասին․նրա խոսքով՝ իր տեսակի մեջ յուրահատուկ թատրոնը միացրին մեկ այլ թատրոնի, և հիմա այն չկա։ Եվ այդ ամենը շենքի, տրածքի համար։ «Կործանեցին մի հրաշալի մշակույթի օջախ ՝ ռեստորան սարքելու համար։ Հիմա այս դեպքում ասում են, որ շենքը տրամադրվելու է Սիմֆոնիկ նվագախմբին, ուզում եմ հավատալ, բայց արդյոք արժե՞ մեկ մշակութային օջախի, ինքնատիպ թատրոնի կործանման, ոչնչացման հաշվին ապահովել մեկ այլ մշակութային միավորի բարեկեցությունը։ Իհարկե՝ ոչ։

Կարծում եմ՝ հենց Սիմֆոնիկ նվագախմբի երաժիշտները և ղեկավարը ոգևորված չեն կարող լինել այս անհեթեթ որոշմամբ։ Փոքր-ինչ Թատրոնից հասկացող մարդը մտքի ծայրով իսկ չի անցկացնի այսպիսի բան, եթե ետին միտք չունի։

Ընդհանրապես կյանքից գիտենք ՝ ուրիշի դժբախտության վրա երջանկություն չես կառուցի․․․ սա հենց այնպես։

Պայքարեք և պահպանեք ձեր տունը, ձեր օջախը։ Այն ձեր ստեղծածն է։ Ձեր փոխարեն դա ոչ ոք չի անի։ Ձեր կողքին եմ»,- գրել է դերասանը։