Հայաստանը ստորագրելու է բարդ, ցավոտ, սուր խնդիրներ պարունակող համաձայնագրեր. ամեն ինչ ձեզնից է կախված. Դավիթ Հարությունյանը՝ ՍԴ դատավորներին

«Պատիվ ունեմ» դաշիքնի ներկայացուցիչ, Արդարադատության նախկին նախարար Դավիթ Հարությունյան այսօր Սահմանադրական դատարանում ունեցած եզրափակիչ ելույթի ժամանակ խոսեց համընդհանուր պարտության ռիսկի մասին, պարզաբանելով այն։ 

«Ինչ վճիռ էլ դուք չկայացնեք, դրանից հետո կյանքը շարունակվելու է, բայց ձեր վճռից է կախված, թե ինչ ճանապարհով կընթանա մեր պետությունը։ Բոլորս գիտենք, որ Հայաստանը առաջիկա ամիսներին ստորագրելու է, Պուտինի բառերով ասած՝  բարդ, ցավոտ ու սուր խնդիրներ պարունակող համաձայնագրեր։ Պարզ է, որ խոսքը գնում է տարածքների, փոշիացվող պատմական իղձերի, ստանձնվող պարտականությունների ու զիջումների վերաբերյալ միջազգային պայմանագրերի մասին, որոնց կյանքի կոչելու հիմնական դերակատարները երկուսն են՝ Ազգային ժողովը, և դուք՝ բարձր դատարան։ Այս գործող Ձեր որոշումից է կախված նման ցավոտ հարցերում Հայաստանի շահերը պաշտպանելու հնարավորությունը ու գործիքակազմը։ Այստեղ ուզում եմ լինել բացարձակ անկեղծ։ Եթե դուք այսօր համարելու եք, որ այս ընտրությունները լեգիտիմ են և Ազգային ժողովի կազմն ունենալու է ԿԸՀ-ի կողմից սահմանված համամասնությունը, ապա դուք զրկում եք Հայաստանին Ազգային ժողովի հարթակում պետական շահերը բազմակողմանիորեն քննարկելու և պաշտպանելու հնարավորությունից»,- ասաց Հարությունյանը ՍԴ-ին՝ նշելով, որ սա հարցի միայն մի կողմն է, քանի որ հենց նրանք են ստանձնելու պատասխանատվությունը Հայաստանի ապագա 100 տարին կանխորոշող ծանրագույն փաստաթղթերի ընդունման համար։ Քանի որ ընտրողների ընդամենը 26 տոկոսով ձևավորված միաբևեռ ԱԺ-ում որոշումը փաստացի ընդունվելու է մեկ անձի կողմից։

Վերջում Դավիթ Հարությունյանը դիմելով ՍԴ դատավորներին՝ ասաց․ «Որոշումը ձերն է, Բարձր դատարան»։