Արցախը փորձում են հայաթափել, և քանի դեռ Փաշինյանի և նրա խունտայի ձեռքում է իշխանութունը, ՀՀ-ն խաչ է քաշելու Արցախի վրա․ մեդիափորձագետ

Մեդիափորձագետ, լրագրող Նաիրի Հոխիկյանը մամուլի ասուլիսի ժամանակ անդրադառնալով տեղի ունեցող իրադարձություններին, ՀՀ-ի վարած քաղաքականությանը՝ նշեց, որ Հայաստանի Հանրապետությունը խաչ է քաշել և խաչ է քաշելու Արցախի վրա այնքան ժամանակ, քանի դեռ իշխանությունը, կառավարությունը այսօրվա մարդկանց՝ Նիկոլ Փաշինյանի և նրա գլխավորած խունտայի ձեռքում է։

«Ի՞նչ պետք է անենք մենք․․ Խնդիրն այստեղ մեր ազգային ինքնության, ազգային մտածողության հարցն է․ ամբողջ խաչը մենք ենք կրում։ Եվ պիտի մենք շարունակենք կրել այնքան ժամանակ, քանի դեռ Հայաստանում իշխանությունն այս մարդկանց ձեռքում է։ Պարզ է, որ նրանք ընդհանրապես Արցախը պատկերացնում են Ադրբեջանի կազմում, Հայաստանն առանց Արցախի, ընդ որում՝ նրանք դա չեն թաքցնում»,- նշեց Հոխիկյանը։

Հոխիկյանի խոսքով՝ ժամեր առաջ արցախահայերից նամակներ է ստացել, որտեղ նրանք  հարցնում են՝ «Այսպես ո՞նց կլինի»։ Հոխիկյանը մանրամասնելով նշեց, որ Կարմիր Խաչը օգնություն է տրամադրում ՀՀ տեղափոխվածներին, այսինքն՝ Արցախից դուրս եկածներին։ 

«Ստացվում է, որ, եթե Արցախից դուրս չես եկել, ապա քեզ չենք օգնի։ Այսինքն՝ հստակ է, որ խթանում են Արցախի հայաթափումը։ Եվ ի՞նչ պիտի անենք մենք։ Մենք պիտի օգնենք այդ մարդկանց, այնպես անեք, որ Արցախը հայաբնակ լինի»,- ասաց Նաիրի Հոխիկյանը։