Ադրբեջանցիները երկու ոտքը դրել են մեկ կոշիկի մեջ և ասում են՝ ո՛չ հոգևորական է գնալու Դադիվանք, ո՛չ որևէ ուխտավոր, ՌԴ նախագահին սա պետք է ներկայացվի. Նաիրի Հոխիկյան

ՌԴ նախագահ Վլադիմիր Պուտինը հստակ հայտարարել էր, որ Դադիվանքը և Շուշիի Սուրբ Ղազանչեցոց եկեղեցին վերցնում է իր անմիջական երաշխավորության ներքո, և որ այդ երկու հայկական, քրիստոնեական արժեքները շարունակելու են մնալ հայկական, քրիստոնեական, ինչպես նաև՝ հայ հոգևորականները կարող են Դադիվանքում հոգևոր ծառայություն մատուցել։ Սակայն, արդեն գրեթե մեկ ամիս է՝ ադրբեջանցիներն արգելում են, որ որևէ ուխտավոր կարողանա գնալ Դադիվանք։ Այս մասին մամուլի ասուլիսի ժամանակ նշեց մեդիափորձագետ, լրագրող Նաիրի Հոխիկյանը՝ անդրադառանով ադրբեջանցիների կողմից ռուս խաղաղապահների վրա ճնշում գործադրելուն։

Հոխիկյանի խոսքով՝ այն հոգևորականները՝ թվով 6, որոնք այժմ ծառայություն են մատուցում Դադիվանքում, չեն կարող դուրս ու ներս անել, այսինքն՝ Դադիվանքից գնալ Մարտակերտ, Ստեփանակերտ կամ որոշակի ժամանակ ծառայելուց հետո՝ փոխարինվել մեկ այլ հոգևորականով։ Այն հոգևորականը, որը դուրս կգա Դադիվանքից, նրա փոխարեն այլ հոգևորական չի կարող գալ։ Այսինքն՝ Դադիվանքը փակ է ադրբեջանցիների կողմից։ 

«Ավելի քան 300 ադրբեջանցի զինվորականներ այժմ շրջափակել են Դադիվանքը, իսկ ծառայություն իրականացնող զինծառայողները թվով 30-ն են։ 6 հայ հոգևորականներից որևէ մեկի՝ Դադիվանքից դուրս գալու դեպքում կամ վտանգ կսպառնա նրա կյանքին, կամ նրա՝ ռուս խաղաղապահների ուղեկցությամբ դուրս գալու դեպքում չի կարող վերադառալ, փոխարինվել մեկ այլ հոգևորականով։ Սրա նպատակն այն է, որ այս հոգևորականները հերթով դուրս գան Դադիվանքից, այն դատարկվի և այդ հոգևոր արժեքը ևս յուրացվի»,- նշեց Հոխիկյանը և հիշեցրեց, որ ադրբեջանցիներն արդեն մեկ անգամ ուդի հոգևորական տարել են Դադիվանք, ինչպես նաև այն ներկայացրել որպես ուդիական հոգևոր արժեք, ինչպես նաև Կովկասի մուսուլմանների հոգևոր առաջնորդ Փաշազադեն վերջերս կրկին հայտարարել է, որ Դադիվանքն ու Ղազանչեցոցն ուդիական քրիստոնեական արժեքներ են։ 

Փորձագետի խոսքով՝ այդպես նրանք այդ հոգևոր արժեքները հեշտությամբ կհանձնեն ուդիներին, որից հետո կա՛մ կոչնչացնեն, կա՛մ կսարքեն մզկիթ։ 

«Իմ տեղեկություններով՝ ռուսները բազմիցս փորձել և հիմա ևս փորձում են խնդիրը լուծել ադրբեջանցիների հետ, սակայն, վերջիններս այսպես ասած՝ երկու ոտքը դրել են մեկ կոշիկի մեջ և ասում՝ «Ո՛չ հոգևորական է գնալու Դադիվանք, ո՛չ որևէ ուխտավոր»։ Շատ կարևոր է, որ և՛ լրագրողական համայնքը, և՛ փորձագետները, և, ինչու չէ նաև քաղաքական գործիչները, ՌԴ նախագահին սա ներկայացնեն ասելով՝ «Չէ՞ որ դու անձամբ էիր երաշխավոր կանգնում Դադիվանքին»»,- ասաց Հոխիկյանը և հավելեց, որ Ադրբեջանը կրկին իր խոստումը դրժում է։