Պատմական բեռը լինելու է ձեր ուսերին՝ Հայաստանի ապագան կանխորոշող ծանրագույն փաստաթղթերի ընդունման համար. Դավիթ Հարությունյանը՝ ՍԴ-ին

Ուզում եմ լինել բացարձակ անկեղծ: Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննության ժամանակ եզրափակիչ ելույթում ասաց «Պատիվ ունեմ» դաշինքի ներկայացուցիչ Դավիթ Հարությունյանը:

«Եթե դուք այսօր համարելու եք, որ այս ընտրությունները լեգիտիմ են, Ազգային ժողովի կազմն ունենալու է ԿԸՀ կողմից սահմանված համամասնությունը, ապա զրկում եք Հայաստանին Ազգային ժողովին քաղաքական հարթակում պետական շահերը բազմակողմանիորեն քննարկելու և պաշտպանելու հնարավորությունից»,-ասաց Դավիթ Հարությունյանը։

Նա ընդգծեց, որ Սահմանադրական դատարանը վերցնելու է ողջ պատմական պատասխանատվությունը Հայաստանի ապագա 100 տարին կանխորոշող ծանրագույն փաստաթղթերի ընդունման համար։

«Ընտրողների ընդամենը 26 տոկոսով ձևավորված միաբևեռ ԱԺ-ում որոշումը փաաստացի ընդունվելու է մեկ անձի կողմից, այնպես որ պատմական բեռը լինելու է ձեր ուսերին»,- ասաց Դավիթ Հարությունյանը:

Բացի այդ նա նկատում է, որ դատաքննության ընթացքում իր ներկայացրած 9 թեզերից ոչ մեկի դեմ իրականում քննադատությանը դիմացող հակափաստարկներ չեն բերվել:

«Եթե արտառոց պայմաններ չլիներ, առաջին թեզի հետ կապված կապացուցեի, որ ֆիզիկական ուժի կամ վարչական ներգործության կիրառման սպառնալիքը, մարդկանց հոգեբանական ահաբեկումն ու նվաստացումը որևէ աղերս չունեն ոչ ժողովրդավարության, ոչ էլ ազատ ընտրությունների սկզբունքի հետ»,- նշեց Դավիթ Հարությունյանը:

Այս առումով «Քաղաքացիական պայմանագիր» կուսակցության հիմնական հակափաստարկը, ըստ Դավիթ Հարությունյանի, կառուցված էր այն սխալական թեզի վրա, որ իբր չկա նյութական իրավունքի նորմ, որը պետք է հիմք հանդիսանար Փաշինյանի խոսքը սահմանափակելու համար:

«Ես կհիմնավորեի, որ նման սահմանափակման և հիմքը, և պահանջն անմիջականորեն բխում է սահմանադրական կարգի հիմունք հանդիսացող ազատ ընտրության սահմանադրական սկզբունքից: Սա առավել քան բավարար հիմք է, որպեսզի հանրային իշխանությունը կյանքի կոչի ազատ ընտրության իրավունքը հարգելու և պաշտպանելու իր պարտականությունը»,- ասաց նա:

Դավիթ Հարությունյանի խոսքով, երկրորդ թեզի հետ կապված կպնդեր, որ հանրային իշխանության ներկայացուցիչ հանդիսանալն առաջին հերթին մեծ պատասխանատվություն է, որը որևէ ընդհանրություն չունի ատելության խոսքի և պատժելու սպառնալիքների հետ:

«Ինչքան էլ «Քաղաքացիական պայմանագիրը» պնդի, որ Փաշինյանի խոսքը իբրև թե ես կոնտեքստից կտրված եմ ներկայացրել, որևէ մեկը հանրությանը չի կարող համոզել, որ այնպիսի արտահայտությունները, ինչին՝ «կապույտ չագուջն առաջինը ձեր գլխին է ջարդվելու», «կտեսնեք կադրային ջարդուփշուր», «պողպատե մանդատով ընտրություններից հետո գալու ենք ձեր հետևից» և այլն, կարող են տեղ ունենալ ժողովրդավարական արժեքներ ապավինող երկրում, ինչն ավելի սարսափելի է՝ կարող է հնչեցվել փաստացի երկրի առաջին դեմքը հանդիսացող անձի կողմից»,- ասաց Դավիթ Հարությունյանը: