Ընտրություններն անցել են նախապես ծրագրավորված, կազմակերպված, զանվածային ընտրախախտումների հիմքի վրա. Արծվիկ Մինասյան

Բարձր դատարանի համար հիմք պետք է հանդիսանա Սյունիքի համայնքապետերի անհիմն ու անօրինական կալանավորումները։ Սահմանադրական դատարանում հունիսի 20-ին կայացած արտահերթ խորհրդարանական ընտրությունների արդյունքներն անվավեր ճանաչելու միավորված գործով դատաքննությանն ընդմիջմանը լրագրողների հետ զրույցում ասաց ՀՅԴ ԳՄ անդամ, «Հայաստան» դաշինքի անդամ Արծվիկ Մինասյանը:

Նա ընդգծեց, որ այդ կալանավորումների հիմքում ընկած է վենդետան, վրեժխնդրությունն ու քաղաքական հետապնդումները:

«Եթե Սահմանադրական Դատարանը լինի անաչառ, յուրաքանչյուր դատավոր առաջնորդվի իր երդմանն համապատասխան, ներքին համոզումով, իրավունքի գերակայության սկզբունքով, պետք է անվավեր ճանաչվեն ընտրության արդյունքները»,-ասաց Արծվիկ Մինասյանը։

Նրա խոսքով, դիմող կողմի բոլոր հրապարակված փաստերը, ներկայացված ապացույցները և հարուցապատասխանով բացահայտված բոլոր արատները փաստում են, որ եղել են բազում ընտրախախտումներ։

«Ընտրություններն անցկացվել են նախապես ծրագրավորված, կազմակերպված, պարբերական բնույթ կրող զանվածային ընտրախախտումների հիմքի վրա։ Արդյունքում ունեն նման խայտառակ ընտրական արդյունքներ, որոնք որևէ ձև չեն կարող արտահայտել հասարակության իրական տրամադրվածությունը»,-ընդգծեց Մինասյանը;։

Միևնույն ժամանակ նա նկատում է, որ այս ֆոնին արդեն նույնիսկ բացարձակ կարևոր չէ տոկոսային ինչ հարաբերակցության մասին կարող է խոսք գնալ, այլ կարևորը այն է, որ իրականում հայ ժողովուրդը, ՀՀ քաղաքացիները ոչ նախընտրական շրջանում, ոչ էլ ընտրություններից հետո բացարձակ չեն արտահայտել այն պատկերն ու արդյունքները, որոնք արձանագրվել են որպես «ընտրության արդյուքներ»։