Մի քանի քռչոտ մանդատ «Հայաստան» դաշինքին ու հանգիստ կնստեն տեղները...

Մինչ Սահմանադրական դատարանում քննարկում են խորհրդարանական արտահերթ ընտրությունների արդյունքներն ու, ըստ էության, ընտրությունները չեղարկելու կամ հաստատելու հարցը, ԱԺ անցած խորհրդարանական նոր ընդդիմության ներկայացուցիչները, մասնավորապես «Հայաստան» դաշինքի անդամները, պաշտոններն ու տեղերը գլխապատառ մեջ-մեջ են անում․․․

Ասել է թե՝ վերջիններիս հուզում էր, ոչ թե իրապես հզոր Հայաստան ունենալու գաղափարը, այլ պարզապես ԱԺ մտնելն ու տարբեր հանձնաժողովումներում յուղոտ պատառներ ունենալը։ 

Համենայնդեպս, NEWSPRESS.am-ի տեղեկություններով, «Հայաստան» դաշինքի որոշ անդամներ հետաքրքրվել են, թե որ հանձնաժողովների անդամներն են ավելի շատ վարձատրվում, որպեսզի հետո տարբերակներ գործի դնեն՝ այդ հանձնաժողովներում ընդգրկվելու համար։

Այս մարդկանց արդեն չի հուզում, որ ՍԴ-ում դեռևս քննարկվում է 8-րդ գումարման ԱԺ-ի լինել-չլինելու հարցը․․․ կամ էլ․․․ նրանք վստահ են, որ ՍԴ-ում հարցի վիճարկումը պարզապես ձևական բնույթ է կրում ու, վաղ, թե ուշ, խորհրդարանական ընդդիմությունը տանուլ է տալու և հանգիստ վերցնի մանդատներն ու նստի իր տեղը․․․ 

Այս ամենին զուգահեռ նաև կա մի այլ պատճառ, որով պայմանավորված «Հայաստան» դաշինքն այնքան էլ վստահություն ու հավատ չի ներշնչում․․․

Օրերս, ասուլիսի ժամանակ դաշինքի ներկայացուցիչ ու ՀՅԴ անդամ Իշխան Սաղաթելյանը հայտարարեց, թե իրենց աշխատանքը միայն խորհրդարանում չի լինի, այլ, անհրաժեշտության դեպքում կլինի նաև դրա պատերից դուրս՝ փողոցում․․․

Հիմա հետաքրքիր է՝ դաշինքի անդամներին հերթով բերման ենթարկելն ու կալանավորելը փողոց դուրս գալու անհրաժեշտություն չէ՞, որ բոլորը բերանները ջուր առած նստել են: Թե՞ նրանց միայն մի քանի քռչոտ մանդատ ունենալու հարցն էր հետաքրքրում:

Այդ մի քանի մանդա՞տն էր պետք «Հայաստան» դաշինքին, երբ «բունտեր» էին անում նույնիսկ այն ժամանակ, երբ իրենցից մեկի կողքով թեթև քամի էր անցնում. այն ժամանակ հարայ-հրոցով ձենձենում էին, թե հարայ-բուդուր, եկան, մտան, խուզարկեցին, տարան... իսկ հիմա՝ ձայն բարբառո հանապատի...

Մինչդեռ այսօր էլ ակցիաների ու փողոցով հարցեր լուծելու կարիք կա, քանի որ Մեղրիի նախկին համայնքապետ Մխիթար Զաքարյանը ձերբակալված է, Քաջարանի քաղաքապետ Մանվել Փարամազյանը՝ երկու ամսով կալանավորած, «Իզմիրլյան» ԲԿ նախկին տնօրեն Արմեն Չարչյանը վիրահատված և դարձյալ, առնվազն մեկ ամսով, կմնա կալանքի տակ, Գորիսի քաղաքապետ Առուշ Առուշանյանը հարցաքննվում է ու անցնում չգիտես ինչ գործերով... մյուսներին ևս հանգիստ չեն տալիս՝ իրավապահների դռները գցելով, բայց դաշինքի անդամներն անհաղորդ են: Ավելի կոնկրետ՝ բավարարվում են երևույթը «դատապարտող» մի հայտարարությամբ ու վերջ...

Այսօրվա դաշինքի անդամները երեկվա անարդարության դեմ պայքարողները չեն, նրանք բառի բուն իմաստով, ՀՔԾ-ի, ՔԿ-ի ու ԱԱԾ-ի պատերի տակ էին քնում, երբ որևէ մեկի կողքով անցնում էին, երբ թշնամին մի թիզ առաջ էր գալիս ու երբ հայրենիքի սահմանների հետ կապված վտանգի հոտ էին առնում...

Հիմա՛ էլ այդ վտանգը կա, չի նահանջել. թշնամին շարունակում է ինժեներական աշխատանքներ իրականացնել Հայաստանի սուվերեն տարածքում, իշխանությունը մնացել է նույն կապիտուլյանտ իշխանությունը ու նոր զիջումներ են սպասվում, էլ չենք խոսում կալանավորումների մասին, բայց դաշինքում լուռ են... Իբր սպասում են ՍԴ որոշմանը...

Հետաքրքիր է, գոնե այս իշխանության հետ փոքրիշատե այս կամ այն խնդրի դեպքում առճակատվելիս՝ սրանք գլխի չընկա՞ն, որ օրենքի լեզվով չեն կարող գործ ունենալ իշխանության հետ.. դրանց հետ հարցերը միայն փողոցով ու կոշտ պայքարով պետք է լուծել...

Իհարկե, հասկացել են, բայց նրանց համար այսպես հարմար է ու այսպես իրենց շահերից է բխում: Իսկ Հայաստանի շահի ու հայ ժողովրդի ճակատագրի հերն էլ անիծած...

Էլ չենք ասում, որ այս կապիտուլյանտների հետ նույնիսկ ընտրության չպետք է գնային...

Բայց գնացին, «շահեցին» 29 մանդատ, ու հիմա հանգիստ կնստեն տեղները...

NEWSPRESS.am