«Մենք բացառում ենք, որ Նիկոլ Փաշինյանը կվերարտադրվի». Արծվիկ Մինասյանի մի սուտ հայտարարության ամբողջ մերկությունը

Մենք բացառում ենք, որ Նիկոլ Փաշինյանը կվերարտադրվի, հակառակ դեպքում` մենք չէինք մտնի պայքարի մեջ, հակառակ դեպքում՝ մեր ժողովրդի վրա մեր վստահությունը չէր լինի: Մենք վստահ ենք մեր ժողովրդի վրա: Եթե իրենք փորձեն ընտրակեղծիքներ, վարչական լծակների գործադրում, և նրանք դա փորձելու են, ստանալու են արժանի հարվածներ՝ թե՛ իրավական դաշտում, թե՛ փողոցային պայքարում, թե՛ քաղաքական, թե՛ բարոյական հարթություններում: 

Այս խոսքերը «Հայաստան» դաշինքի մայիսի 28-ին կայացած հանրահավաքից հետո հեղինակել է ՀՅԴ-ական Արծվիկ Մինասյանը: 

Ուշադիր ընթերցողն արդեն հասկացավ, որ Մինասյանի այս հայտարարության որևէ միտք իրականություն չդարձավ: Չդարձրին: Այլ խոսքով՝ Մինասյանը ստում էր. ինչպես տեսնում ենք, իշխանությունն ընտրակեղծիքների դիմեց, վարչական լծակներ կիրառեց, բայց դրան չհետևեցին «արժանի հարվածները»՝ ո՛չ իրավական դաշտում, առավել ևս չհետևեց փողոցային պայքարը, փոխարենը՝ իշխանությունը միացրեց ռեպրեսիվ մեքենան ու ճնշումներ սկսեց դաշինքի անդամների նկատմամբ: 

Ո՞ւր են այս ուժի այն ծայրահեղ ընդդիմադիրները՝ հատկապես ՀՅԴ-ական, որոնք իրենց ղժղժոցով վանում էին դեռևս Հայրենիքի փրկության շարժման հանրահավաքները: Արդեն աթոռներ ունե՞ն, ապագա պատգամավորնե՞ր են: 

Ընդհանրապես, այս դաշինքը քարոզարշավի ինչ-որ պահից կտրվեց իրականությունից և քարոզարշավն իրականացրեց արդեն հաղթողի ու իշխանության դիրքերից: Հենց Արծվիկի նման մեծ-մեծ խոսողները և դրան ի հակադրություն ընտրությունների արդյունքները վերջնականապես հիասթափեցրին մինչև 20-25 աստիճան ցրտին Նիկոլ Փաշինյանի դեմ ցույցեր իրականացնող մարդկանց: 

Եվ հանրությունը հասկացավ, որ հերթական անգամ խաբվում է՝ իրեն ասում են, որ բացառում են Փաշինյանի վերարտադրությունը և նա կանգնում է հենց այդ ուժի կողքին, մինչևդեռ վերջինները գնում են նրա դիմաց որպես ընդդիմադիր նստելու և «պարոն վարչապետով» դիմելու: 

Իսկ ո՞ւր են փողոցային ցույցերը, անհնազանդության ակցիաները, թե՞ դաշնակցականները հաշտվել են ընտրությունների արդյունքների հետ և կարծում են, որ ամեն ինչ լավ է երկրում: Չէ՞ որ այսօր՝ ընտրություններից հետո, որևէ դրական տեղաշարժ չի եղել այն հանրահավաքներից ու բողոքի ակցիաներից ի վեր, որոնք անում էին այս ուժը և հատկապես նրանց երիտասարդները: 

Փաստորեն, զուր էին իսկապես ընդդիմադիր քաղաքացիների պնդումներն ու համոզումները, թե ընդդիմության պայքարը աթոռի համար չէ: Փաստորեն, Մինասյանի նմանների պայքարը հենց աթոռի համար էին: 

NEWSPRESS.am