ՔՊ ցուցակով պատգամավոր ընտրված Վահե Ղալումյանը հայհոյում է տավուշցիներին. News.am

News.am-ը գրում է. «Վարչապետի պաշտոնակատար Նիկոլ Փաշինյանի քավորի՝ Տավուշի մարզպետ Հայկ Ղալումյանի եղբայրը՝ «Քաղաքացիական պայմանագիր» կուսակցության ցուցակով պատգամավոր ընտրված Վահե Ղալումյանը հայտնվել է հերթական սկանդալի կենտրոնում։

Վերջին օրերին մարզպետի եղբայրը հերթական հայտարարությունն է արել Տավուշի սահմանամերձ գյուղերի վերաբերյալ, որը հարուցել է տավուշցիների դժգոհությունը։ «Իմքայլական» նախկին պատգամավորը, լրատվամիջոցներից մեկին տված հարցազրույցում, անդրադառնալով Տավուշի մարզից Ադրբեջանին զիջվող ենթադրյալ տարածքներին, նշել է, որ այդ գյուղերը բնակեցված չեն․ «Բացարձակապես մարդ չկա, քանդված, փլատակ, ամայի տարածքներ հիշեցնող գյուղեր են»,–նշել է նա։ Այս հայտարարությունից վրդովված տավուշցիները «Ֆոյսբուքում» քննադատություններ են հնչեցրել Ղալումյանի հասցեին, ինչը չի վրիպել իշխանական ապագա պատգամավորի աչքից։ 

Ղալումյանը, որն իր ֆեյսբուքյան անձնական էջում սահմանափակել է մեկնաբանությունների դաշտը, լրատվականների նյութերի տակ իր հասցեին քննադատություն հնչեցրած օգտատերերին անձնական նամակներով հայհոյանքներ է գրել։ Տավուշի սահմանամերձ գյուղերի բնակիչներից մեկն ուղարկել է Ղալումյանի՝ իրեն ուղղված նամակը, որը էթիկայի նորմերից ելնելով մասամբ ենք հրապարակում։ Մեր զրուցակցի խոսքով՝ Ղալումյանը այլ մարդկանց ևս նմանատիպ նամակներ է ուղարկել։

Ապագա խորհրդարանի անդամը հավանաբար տեղյակ չէ, որ պաշտոնյան պետք է հանդուրժողաբար վերաբերվի իրեն քննադատողներին կամ էլ նախքան ԿԸՀ–ից մանդատ ստանալը որոշել է «մուռը հանել» իր այն համերկրացիներից, որոնք դեմ են «անկլավը անկլավի դիմաց» սկզբունքով Տավուշի գյուղերը փոխանակելուն»։