Հայկական ընտանիքները ճգնաժամի մեջ են. ամուսնալուծություններն ավելացել են

Հայաստանում 2014թ-ին 2013թ-ի համեմատ ավելացել է ամուսնալուծությունների թիվը: Հայաստանում 2013թ-ին գրանցվել է 18 363 ամուսնություն, իսկ 2014թ-ին՝ 18 912: 2013-ին ամուսնալուծությունները կազմել են 3 756, իսկ 2014թ-ին՝ 4 496:

Ամուսնալուծությունների աճի վերաբերյալ newspress.am-ի հետ զրույցում իր տեսակետը ներկայացրեց սոցիոլոգ Ահարոն Ադիբեկյանը:

Ըստ նրա, Հայաստանում ամուսնալուծությունների նման աճի պատճառներից մեկն այն է, որ հայ տղամարդիկ գնում են արտագնա աշխատանքի, ստեղծում են երկրորդ ընտանիքը, իսկ հայրենիքում մնացած ընտանիքը չի կարողանում հաղթահարել դժվարությունները, միայնակ կինը նպաստ է ստանում պետությունից, թեպետ նա ունի ամուսին, սակայն երեխան գրանցված է մոր անունով:

Սոցիոլոգը գտնում է, որ հնարավոր է ամուսնական ճգնաժամերից դուրս գալ, եթե ձևավորվեր խորհրդատուների ինստիտուտը:

«Ապացուցված է, եթե 10 հոգի դիմում է խորհրդատուին՝ ընտանեկան ճգնաժամերի պատճառով, ապա 9-ը հետ են կանգնում ամուսնալուծությունից, հասկանալով, որ խնդիրներն իրենց մեջ են»,- ասաց նա:

Ահարոն Ադիբեկյանը նշեց, որ ամուսնալուծությունների հիմնական նախաձեռնողները կանայք են, քանի որ կանայք ավելի էմոցիոնալ են, իսկ ցանկացած բախում կարող է բերել կնոջ կողմից ապահարզանի ներկայացման: Թեև շատ կանայք հաղթահարում են դժվարությունները, սակայն հաճախ ամուսնալուծությունեը միակ ելքն է:

Ըստ նրա, եթե նախկինում ամուսնալուծվում էր 10 ընտանիքից 9-ը, ապա այսօր 10 ընտանքից՝ երկուսը. մայրաքաղաքում ամուսնալուծությունների թիվն ավելի շատ է քան մարզերում:

«Այս ամենով հանդերձ Հայաստանը համարվում է բարեհաջող ընտանիք ունեցող ազգ»,- շեշտեց սոցիոլոգը:

Նշենք, որ 2004թ-ից ի վեր ամուսնալուծությունների ամենամեծ թիվը գրանցվել է նախորդ տարի, իսկ Երևանում նախորդ տարի՝ 2013թ-ի համեմատ ամուսնությունների թիվը զգալիորեն նվազել է, ամուսնալուծությունների թիվը՝ ավելացել: