Վերցնե՞լ, թե՞ չվերցնել մանդատները. ստացել ենք պայքարը շարունակելու շատ լուրջ նոր հնարավորություն. Ռոբերտ Քոչարյան (տեսանյութ)

Քննարկումներ են գնում, թե՝ կրել ենք, չենք կրել, պարտվել ենք, չենք պարտվել, ես նկատել եմ սոցցանցերում որոշակի հիասթափության, տրամադրությունների անկման տենդենց: Սրանք նախագահական ընտրություններ չեն: Նախագահական ընտրություններում պրիզը մեկն է, կա կրող և կա պարտվող: Խորհրդարանական ընտրություններում պարտվում են նրանք, ովքեր չեն անցնում խորհրդարան: Բոլոր նրանք, ովքեր անցնում են, պարտված չեն համարվում: Այս մասին այսօր «Հայաստան» դաշինքի առաջնորդների մամուլի ասուլիսի ժամանակ ասաց դաշինքի առաջնորդ, Երկրորդ նախագահ Ռոբերտ Քոչարյանը: 

«Մի հետաքրքիր հանգամանք, ես կառաջարկեի նայեք, թե ինչ տոկոսներ են հավաքել այն կուսակցությունները, որոնց նպատակը քարզարշավի ժամանակ եղել է մեր դեմ քարոզչություն տանելը, կոնկրետ «Հայաստան» դաշինքի և իմ դեմ, ինչ տոկոսներ են հավաքել, սա ամենից լավ ցուցանիշն է, թե ինչ է կատարվել այդ դաշտում»,- ասաց նա: 

Ինչ վերաբերում է հարցին, թե վերցնե՞լ մանդատները, թե՞ չվերցնել, ապա, Քոչարյանի խոսքով, դաշինքում վերջանական որոշում այս հարցի վերաբերյալ չունեն:

«Ես կարող եմ ասել իմ անձնական կարծիքը: Երեկ քննարկում էինք այստեղ նաև ավելի լայն կազմով, և Սեյրան Օհանյանը մի հետաքրքիր համեմատություն բերեց, ասաց, որ մարտական գործողությունների ժամանակ, եթե ամբողջական խնդիրը չի լուծվում, բայց դու վերցնում ես ինչ-որ խրամատներ, ապա պիտի այդ խրամատները ոչ թե պահես, այլ ամրացնես հետագա գրոհի համար: Հիմա պատերազմ չէ, բայց քաղաքական պայքար է, այդ և համեմատությունն ավելի մեղմ տերմիններով կարելի է կիրառել նաև այս պարագայում: Ես, այո, ես համարում եմ, որ մենք ստացել ենք մեր պայքարը շարունակելու համար շատ լուրջ նոր հնարավորություններ: Ի՞նչ ենք մենք տրամադրված անել: Շարունակել մեր պայքարը, և պառլամենատական պայքարը միայն կարող է ուժեղացնել, այլ ոչ թե փոխարինել փողոցային պայքարին: Մենք ունենք շատ ակտիվ կողմնակիցներ, փողոցային պայքարի մեծ փորձ, և կարծում եմ այդ համատեղումը միայն ուժեղացնում է մեր հնարավորությունները»: 

Մանրամասները՝ տեսանյութում