Սա հեղափոխության վերջին փամփուշտն էր. այն մանդատը, որը ստացել է այս իշխանությունը, իր նկատմամբ վստահության մանդատ չէ. Քոչարյան (տեսանյութ)

Պետք է խոստովանեմ՝ ընտրությունների արդյունքները մեզ համար անսպասելի էին, նաև շատ-շատերի համար, առաջին հերթին այն պատճառով, որ բոլոր հարցումները՝ տարբեր սոցիոլոգիական կազմակերպությունների, ցույց էին տալիս այլ պատկեր, այդ թվում՝ «Գելափ»-ինը, որին չի կարելի կասսկածել իմ նկատմամբ «սիմպատիաների» մեջ: Այս մասին այսօր «Հայաստան» դաշինքի առաջնորդների ասուլիսի ժամանակ ասաց դաշինքի առաջնորդ, Երկրորդ նախագահ Ռոբերտ Քոչարյանը: 

«Մենք ենթադրում ենք, որ այնուամենայնիվ եղել են զանգվածային խախտումներ, մենք տեսել ենք զանգվածային ռեսուրսի կիրառում: Դիմելու ենք Սահմանադրական դատարան՝ ընտրությունների արդյունքները քննարկելու համար: Հիմա մեր շտաբների կողմից հավաքագրվում են բոլոր այդ նյութերը: Մի քանի օրվա ընթացքում ի մի կբերենք և մենք էլ կպատկերացնենք, թե ինչ ծավալի բողոք է լինելու ՍԴ ներկայացնելու համար»,- ասաց Քոչարյանը: 

Նա համոզված է, որ այն մանդատը, որը ստացել է այս իշխանությունը, դա այս իշխանության նկատմամբ վստահության մանդատ չէ:

«Մեր բոլոր հանդիպումները եղել են և՛ ավելի մարդաշատ, քան իշխանության ներկայացուցիչների հանդիպումները, և՛ ավելի հզոր էներգետիկայով, քան իշխանության բոլոր հավաքները»,- ասաց դաշինքի առաջնորդը: 

Քոչարյանի անձնական կարծիքով՝ աշխատել է մի գործոն՝ նախկին իշխանությունների վերադարձի գործոնը և այդ գործոնն էապես ուժեղացրել է այն հանգամանքը, որ 3 նախկին նախագահները մասնակցում էին ընտրություններին՝ 2-ը գլխավորելով ընտրացուցակներ, 3-րդը՝ շատ ակտիվ մասնակցելով քարոզարշավին:

«Մենք չկարողացանք կոտրել այդ հանգամանքը, քանի որ քարոզարշավը շատ կարճ էր, չէինք հասցնում և հատկապես գյուղական վայրերում մենք բավական քիչ հանդիպումներ ենք ունեցել: Եվ եթե նկատել եք՝ իշխանությունը շատ ավելի մեծ արդյունքներ է գրանցել հենց գյուղական վայրերում: Կարծում եմ՝ 1-2 շաբաթ ավելի երկար քարոզարշավ ունենալու պարագայում, մենք կկարողանայինք փոխել այդ պատկերացումը: Մարդիկ վերջին պահին մտահոգություն ունենալով քվեարկեցին ներկա իշխանության օգտին: Սա երևի հեղափոխության վերջին փամփուշտն էր, բայց չեմ կարծում, որ իշխանությունը ճիշտ է գնահատում այս վիճակը, իրենք մտածում են, որ սա նոր մանդատ է իրենց համար, բայց, կրկնում եմ, սա հակառակ կողմից եկող մանդատ էր»,- ասաց Քոչարյանը: 

Մանրամասները՝ տեսանյութում