Տոմատի մածուկից մինչև զուգարանի թուղթ` «ՀայՓոստ»-ում. (ֆոտո)

«ՀայՓոստ» փակ բաժնետիրական ընկերության Գեղարքունիքի մարզի բաժանմունքների աշխատակիցներն անկաշկանդ առևտուր են իրականացնում. կամ, ինչպես սովետական ժամանակաշրջանում կասեին` սպեկուլյացիա են անում:

Մասնավորապես, Սևան քաղաքի Նաիրյան 15/1 հասցեում գործող «ՀայՓոստ»-ում, որը տնօրինում է ոմն Վահրամ Հովհաննիսյան, փոստային ծառայություններից օգտվելուց բացի, հաճախորդներին առաջարկում են նաև հագուստ, կոշիկներ ու տնտեսական ապրանքեր: Մի խոսքով` այն ամենը, ինչ կարելի է գնել ամենասովորական մարկետներից:

Երևույթի մասին newspress.am-ը տեղեկացավ քաղաքացիներից մեկի ահազանգի միջոցով: Վերջինս ցանկացել էր օգտվել «ՀայՓոստ»-ի ծառայություններից, սակայն աշխատակցուհիներից մեկը նրան հորդորել էր սպասել, քանի որ այդ պահին մի երեխա կոշիկ էր փորձում:

Խնդրի շուրջ պարզաբանումներ ստանալու համար հեռախոսակապ հաստատեցինք հիշյալ բաժանմունքի հետ: Աշխատակցուհիներից մեկը տեղեկանալով հարցի բնույթին` հորդորեց քիչ հետո զանգել: Սակայն լսափողն իրավասու անձի փոխանցելու մեր պնդումներից հետո, մեզ հետ խոսեց ավագ օպերատորը:

Նա ամեն կերպ փորձում էր համոզել, որ դա օրինական է, և, ինչու չէ, դրոշմանիշների կամ գրենական պիտույքների հետ, հաճախորդներին առաջարկում են նաև տնտեսական ապրանքեր ու կոշիկներ:

«Դա տոնավաճառ չէ, մարկետ է, փոստ-մարկետ է կոչվում»,- ոգևորված բացատրում էր օպերատորը:

«Ես համամիտ եմ Ձեր հետ, որ չի վաճառվելու, բայց մենք մեր ծառայությունն ենք կատարում, մենք հո ինքնուրույն չենք կատարում: Դա մեզ ասում են»,- նշեց աշխատակիցը: Հարցին, թե ով է իրենց ասում` չպատասխանեց, խորհուրդ տվեց խոսել տնօրեն Վահրամ Հովհաննիսյանի հետ:

Վերջինս էլ նախ փորձում էր համոզել, որ նման բան չկա, սակայն, երբ փաստեր ներկայացրեցինք, խորհուրդ տվեց այդ մասին գրելուց առաջ խոսել իրենց լրատվության և հասարակայնության բաժնի հետ:

«Սա որոշում է վերևներից»,- հեռախոսազրույցում ասաց «ՀայՓոստ» ՓԲԸ մամուլի քարտուղար Գևորգ Աբրահամյանը: Թե որ վերևների մասին էր խոսքը` չմանրամասնեց, միայն այդ ցուցակից բացառեց «ՀայՓոստ Թրասթ Մենեջմենթ» ընկերության գլխավոր տնօրեն Խուան Պաբլո Գեչիչյանի անունը, ով, ի դեպ, բնակվում է Վահագնի թաղամասում:

Նա երևույթը անվանեց կոմերցիոն մարկետինգ, որը իրականացվում է բոլոր «ՀայՓոստ»-երում: Newspress.am-ի դիտարկմանը, թե ոչ մայրաքաղաքի, ոչ էլ հարակից քաղաքների փոստերում նման երևույթի ականատես չենք եղել, նա սրտնեղեց, թե ինչու ենք մենք դրան այդքան նշանակություն տալիս և ուշադրություն դարձնում:

«Ի վերջո ժավելի սպիրտն ու զուգարանի թուղթը վատ բան չեն»,-փորձում էր երևույթն արդարացնել Գևորգ Աբրահամյանը: