Միհրան Պողոսյանը կմասնակցի ընտրություններին․ ԿԸՀ-ից նրա օգտին կբռնագանձվի 4000 դրամ

Վարչական դատարանը անվավեր է ճանաչել Կենտրոնական ընտրական հանձնաժողովի «Հայաստանի Հանրապետության Ազգային ժողովի 2021թ. հունիսի 20-ի արտահերթ ընտրություններին մասնակցող «Պատիվ ունեմ» դաշինքի ընտրական ցուցակում ընդգրկված պատգամավորի թեկնածու Միհրան Պողոսյանի գրանցումն ուժը կորցրած ճանաչելու մասին» թիվ 129-Ա որոշումը: Այս մասին տեղեկանում ենք Դատական տեղեկատվական համակարգից:

Վարչական դատարանը վճռել է՝ Միհրան Պողոսյանի հայցը բավարարել մասնակիորեն:

Հայաստանի Հանրապետության կենտրոնական ընտրական հանձնաժողովի 08.06.2021 թվականի «Հայաստանի Հանրապետության ազգային ժողովի 2021 թվականի հունիսի 20-ի արտահերթ ընտրություններին մասնակցող «Պատիվ ունեմ» դաշինքի ընտրական ցուցակում ընդգրկված պատգամավորի թեկնածու Միհրան Պողոսյանի գրանցումն ուժը կորցրած ճանաչելու մասին» թիվ 129-Ա որոշումը ճանաչել անվավեր:

Մնացած՝ Միհրան Պողոսյանին որպես «Պատիվ ունեմ» դաշինքի ընտրական ցուցակի 11-րդ համարով գրանցված թեկնածու ճանաչելու պահանջի մասով, հայցը մերժել:

Հայաստանի Հանրապետության վարչական դատարանում գործի քննության հետ կապված՝ կողմերի միջև դատական ծախսերի բաշխման մասով՝ Հայաստանի Հանրապետության կենտրոնական ընտրական հանձնաժողովից հօգուտ Միհրան Պողոսյանի բռնագանձել 4000 ՀՀ դրամ՝ որպես հայց ներկայացնելու համար սահմանված և նախապես վճարված պետական տուրքի հատուցում:

Վճիռը վերջնական է, վերանայման ենթակա չէ և ուժի մեջ է մտնում հրապարակման պահից: