Հիստերիկությունն այն զենքն է, որն օգտագործում են, ժողովուրդ, ձեզ կուրացնելու, խլացնելու համար․ Արտաշես Ալեքսանյան (տեսանյութ)

Երևի մի փոքր անսովոր է, չէ՞, որ ոչ մեկին չենք հայհոյում։ Այս մասին այսօր Գեղարքունիքի մարզի Սևան քաղաքում ասաց ՀՀ վաստակավոր արտիստ, «Մեր տունը Հայաստանն է» կուսակցության կազմում պատգամավորի թեկնածու Արտաշես Ալեքսանյանը։ 

«Աշխարհի հարուստ հայերի ցուցակը, որ նայում ենք, տեսնում ենք՝ ինչքան հարուստներ ունենք, ովքեր պարտավոր և պարտական են օգնելու, սատար կանգնելու հայրենիքին, բայց այդ մեծ ցուցակից առանձնացավ մի անձնավորություն՝ Արա Աբրահամյան անուն ազգանունով։ Ի՞նչը ստիպեց։ Սերը, ցավը հայրենիքի նկատմամբ։ Այո, սերը, ցավը և հարգանքն իր ժողովրդին»,- ասաց Արտաշես Ալեքսանյանը։ 

Նա նշեց, որ ինքը բոլոր պատերազմներին մասնակից է եղել։ 

«Կուզեի իմ զինակից ընկերները մի քանի խոսք ասեին, որովհետև քարզարշավի մասնակիցները ոչ մի անգամ Արցախի խնդրի մասին չխոսեցին, ոչ մի անգամ գերիներից չխոսեցին, ոչ մի բան չխոսեցին զոհվածների մասին»,- ասաց Ալեքսանյանը։

Դերասանը կրկնօրինակեց Փաշինյանի ջղագրգիռ ելույթներից մեկը և դա որակեց հիստերիկություն։

«Դա այն զենքն է, որն օգտագործում են, ժողովուրդ, ձեզ կուրացնելու, խլացնելու համար։ Նրանք պատմությունը մի քիչ ուսումնասիրելով, ուսումնասիրելով Հիտլերի, Մուսոլինիի ելույթները՝ կրկնօրինակում են, գալիս են, ուզում են ձեզ փոխանցել։ Ես ձեզ խնդրում եմ՝ եղեք աչալուրջ։ Աստված մարդուն ստեղծելուց տվեց աչք՝ տեսնելու այն, ինչ պետք է տեսնի, տվեց ականջ՝ լսելու այն, ինչ պետք է լսի և լեզու՝ խոսելու այն, ինչ պետք է խոսի, Ուրեմն մի փոքր լարենք մեր ուշադրությունը և կհասկանանք, թե որտեղ է ճիշտը և որտեղ է սուտը»,- ասաց պատգամավորի թեկնածուն։ 

Մանրամասները՝ NEWSPRESS.am-ի տեսանյութում