Դուք վարկ եք վերցնում, կարկուտը բերքը փչացնում է, ո՞նց փակեք վարկը․ Արա Աբրահամյանի լուծումները գյուղացու խնդիրներին (տեսանյութ)

Ես ինքս գյուղացի եմ։ Գյուղացին պետք է իր գործով զբաղվի, նա չպետք է մտածի՝ սերմացուն որտեղից վերցնեմ, պետք է մեկ զանգով բերեն, իր սերմացուն տան, չպետք է մտածի, թե տրակտոր որտեղից բերեմ՝ վար անեմ, պետք է զանգի ասի՝ ինձ 4 ժամով կամ 2 օրով տրակտոր է պետք։ Այդ մասին Գեղարքունիքի մարզի Սևան քաղաքում «Մեր տունը Հայաստանն է» կուսակցության նախընտրական քարոզարշավի ժամանակ ասաց Ռուսաստանի հայերի միության նախագահ Արա Աբրահամյանը՝ պատասխանելով քաղաքացու հարցին, թե ի՞նչ պետք է անի գյուղացին, ինչպիսի՞ն պետք է լինի նրա կյանքը։ 

«Մենք պետք է պարարտանյութերի պահեստ ունենանք, և ամեն ինչի գները պետք է համապատասխան լինեն ձեր ունեցած գումարներին, որ կարողանաք գնել։ Մեր ծրագրերով այս բոլորը պետք է լինեն, պետք է լինեն փոքր, մեծ կամ միջին ձեռնարկություններ՝ պետության հետ միասին, այսինքն՝ պետական ու մասնավոր։ Ինչու պետության հետ, որպեսզի պետությունը հսկի գները, որեսզի գները չբարձրանան, դուք լավ գներով ստանաք»,- ասաց Աբրահամյանը։ 

Նա նշեց, որ ինքը լավ գիտի, թե ինչ է գյուղացու կյանքը և խոստացավ, որ գյուղացու կյանքը լրիվ կփոխվի, եթե կյանքի կոչվեն իրենց ծրագրերը։ 

«Պատկերացրեք՝ շատ լավ գներով ձեզ տալիս են պարարտանյութ՝ վարկով, ձեզ տալիս են սերմացու, ձեզ տալիս են մեքենա, դուք աշխատում եք։ Տարվա վերջին, ապրանքը վաճառում եք, գումարը փակում եք, բայց այդպիսի տոկոսներ չեն լինում, ինչպիսին այսօր է։ Այնպես որ՝ գյուղացու կյանքը լրիվ կփոխվի»,- ասաց ՌՀՄ նախագահը։ 

Աբրահամյանը շեշտեց՝ կարևոր է, որ լինի գյուղատնտեսական ապահովագրություն, քանի որ եղանակային պայմանների պատճառով։ 

Ես գիտեմ՝ ինչ է նշանակում վարկ վերցնել, հետո կարկուտը խփի կամ եղանակի պատճառով չստացաք բերք, դուք որտեղի՞ց փակեք վարկը։ Պետք է լինեն ապահովագրական ընկերություններ, որպեսզի ձեզ այդ խնդիրներից ապահովագրեն, բայց ոչ մեծ գումարներով։ Ամեն ինչ պետք է լինի այնպես, որ պետությունը զարգանա, գյուղացու վիճակը լավացվի, այդ ժամանակ չեն լինի ոչ տոկոսներ, ոչ էլ պետք է գան, էդ տոկոսները փակեն։ Ամեն անգամ էլ խոսք են տալիս, որ կգանք, կփակենք, բայց ոչինչ չեն փակում, ոնց որ պարտքի տակ է ժողովուրդը, այդպես էլ մնացել է»,- ասաց Աբրահամյանը։