Նորատուսի գյուղապետը ժամանակավորապես անհասանելի է, իսկ դատախազը` անհետ կորած

Վաղ առավոտից Գեղարքունիքի մարզի Նորատուս գյուղի բնակիչները փակել են Երևան Վարդենիս ավտոճանապարհի Մարտունի- Գավառ խաչմերուկը: Նորատուսցիների խոսքով՝ իրենց բողոքի ակցիան ուղղված է Գեղարքունիքի դատախազությանը: Նրանք վստահեցնում են, որ դատախազ Արսեն Արսենյանը, իրենց նկատմամբ չհիմնավորված ցուցումներ է կիրառում և չարաշահում պաշտոնի լիազորությունները:

Խնդրի շուրջ պարզաբանումների նպատակով newspress.am-ը վաղ առավոտից փորձում է կապ հաստատել գյուղապետ Մուրադ Հարությունյանի հետ:

Սկզբում նա չէր պատասխանում զանգերին, իսկ հետո արդեն գյուղապետի հեռախոսն անջատված էր, կամ, ինչպես ասում են, բաժանորդը ժամանակավորապես անհասանելի էր:

Գյուղապետարան ուղղված զանգերը ևս արդյունք չտվեցին: Գրանցված հեռախոսահամարներից մեկն ընդհանրապես չէր պատասխանում, իսկ մյուսի զանգին պատասխանեցին` «էսիկ գյուղապետարանը չէ, ու ընդհանրապես էս համարը այլևս Նորատուսինը չէ»:

newspress.am-ը փորձեց որոշակի տեղեկություն ստանալ հենց դատախազությունից, որին էլ ուղղված էր հավաքված քաղաքացիների բողոքը: Այստեղ նախ հաճելի ձայնով մի աղջիկ, հավանաբար գործավարուհին, բարեհամբույր հաստատեց, որ «այո, սա Գեղարքունիքի մարզի դատախազությունից է», այնուհետև, իմանալով մեր ով լինելն ու իրենց զանգահարելու պատճառը, աղջիկը մեկ րոպե խնդրեց և անջատեց լսափողը:

Ճիշտ 30 րոպե անընդմեջ զանգերից հետո վերջապես դատախազության աշխատակցուհին վերցրեց լսափողը և, ներողություն խնդրելով, որ անջատել է՝ պատասխանեց.
«Ես ճշտեցի և իմացա, որ այդ հարցերով մենք չենք զբաղվում, խնդրում ենք դիմել դատախազության հասարակայնության հետ կապերի բաժին»:

Դիտարկմանը, թե բողոքն ուղղված է հենց դատախազի դեմ և ցանկանում ենք լսել նրա պարզաբանումները, աշխատակցուհին ասաց. «Չէ, մենք չենք էդ հարցերով…. զանգահարեք կապերի բաժին»:

Իսկ երբ հեռախոսահամար խնդրեցիք` պարզվեց, որ դատախազությունում չգիտեն իրենց ենթակառույցների հեռախոսահամարները: