«Վերցնել թուղթ ու գրիչ». Ռոբերտ Քոչարյանը քաղաքացիներին առաջարկում է անել 3 պարզ քայլ (տեսանյութ)

Ես այսօր Գորիսում հանրահավաքի ժամանակ մեր քաղաքացիներին առաջարկել եմ անել 3 պարզ քայլ: Այս մասին այսօր Սյունիքի մարզի Սիսիան քաղաքում ասաց ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը: 

«Քայլ առաջին՝ վերցնել թուղթ ու գրիչ, պարտադիր անջատել Հ1-ը և սորոսական այլ լրատվամիջոցներ և հանգիստ պայմաններում փորձել շարադրել, թե որոնք են այսօրվա երկրի առջև կանգնած մարտահրավերները: Ես վստահ եմ, որ մեր բնակչության 99 տոկոսը գրելու է անվտանգություն, տնտեսական իրավիճակ և ներքաղաքական մթնոլորտ»,- ասաց Քոչարյանը: 

Երկրորդ քայլով, ըստ Երկրորդ նախագահի, քաղաքացին պետք է պատասխանի հարցին, թե ներկա իշխանությունն ի վիճակի՞ է այս հարցերի լուծումը տալ, թե՞ ոչ:

«Իմ կարծիքով՝ բացարձակ ոչ, քանի որ իրենք են ստեղծել այս իրավիճակը: Երբ որ մեկը մի բան փչացնում է, մասնագետ են կանչում, ասում են՝ արի շտկիր: Սրանք են մեր երկրի բոլոր պրոբլեմների աղբյուրը՝ իրենցից է ամեն ինչ սկսել, իրենց ապիկարությունից, իրենց անտարբերությունից, իրենց՝ ոչ պրոֆեսիոնալ կառավարումից, նաև, կարծում եմ, դավաճանությունից, կամ հայրենասիրության պակասից, ավելի ճիշտ՝ լիակատար բացակայությունից»,- նշեց Քոչարյանը: 

Ինչ վերաբերում է անվտանգության հարցերին, ապա, ըստ նրա, բանակը անվտանգության ողնաշարն է:

«Մի քաղաքական ուժ, որը 3 տարի հետևողականորեն, ջանասիրաբար քանդում էր բանակը, չի կարող վերափոխվել ու սկսել հանկարծ բանակը կառուցել: Այդպես կյանքում չի լինում: Իրենք շարունակելու են քանդել այն, ինչ բանակից մնացել է»: 

Անդրադառնալով տնտեսությանը Քոչարյանը հարցրեց, թե մարդիկ հիշո՞ւմ են, թե ինչպիսի խոստում են իրենց տվել տնտեսության մասին. «Ասել են՝ տնտեսական վերելք, կախարդական փայտիկ, մենք ստացանք տնտեսական անկում, ասում էին թռիչքաձև աճ, ստացանք թռիչքաձև անկում, ստացանք աղքատության աճ, արտագաղթի շեշտակի աճ՝ 80 հազար մարդ՝  4 ամսում, այդպիսի թվեր Հայաստանում չեն եղել 25 տարի»:

«Հայաստան» դաշինքի վարչապետի թեկնածուն խոսեց նաև ներքաղաքական մթնոլորտի մասին:

«Այս հասարակությունը սև ու սպիտակների մենք չենք բաժանել, հների նորերի մենք չենք բաժանել, հայաստանցի-ղարաբաղցի մենք չենք բաժանել, իրենք են բաժանել: Հիմա մենք պետք է հավատանք, որ իրենք ունակ են դա վերականգնելո՞ւ: Մենք տեսնում ենք իրենց քարոզարշավի թեզերը: Տեսնում ենք, որ իրենք ոչ թե հետևություն են արել իրենց սխալներից, ոչ թե ժողովրդին ասում են՝ ներողություն, սիրելի ժողովուրդ, ճիշտ չենք հաշվարկել, սխալվել ենք, բայց խոստանում ենք այս սխալները չգործել: Դուք որևէ մի տեղ այսպիսի հայտարարություն լսե՞լ եք այդ քայլածներից: Ես չեմ լսել, եթե լսել եք՝ հուշեք, միգուցե ես եմ բաց թողել: Դուք հասկանում եք՝ ինչ իրավիճակ է ստեղծվել. երկրի գլխին բերես այս արհավիրքը և ներողություն չխնդրես և չասես՝ գիտե՞ք սիրելիներս, ես վերանայել եմ իմ հայացքները, ես սխալվել եմ այստեղ, այստեղ, և պատրաստ եմ սխալներս ուղղել: Չեն ասում, ընդհակառակը, ասում են՝ մենք հպարտ ենք մեր պարտությամբ, մենք հպարտ քաղաքացի ենք: Մեկ-մեկ ես չեմ հասկանում՝ ինչ են ուզում ասել»,- ասաց Քոչարյանն ու առաջարկեց անել 3-րդ քայլը: 

«Այս ամենից հետո ես մեր քաղաքացիներին առաջարկում եմ անել 3-րդ քայլը՝ իսկ մենք ո՞ր քաղաքական ուժին կարող ենք վստահել երկիրը: Քաղաքական ուժին, որն ունի բավարար փորձ, գիտելիքներ, վճռականություն և կամք: Մենք այդ որակներն ունենք, կարող է ուրիշներն էլ ունեն: Մենք դա հաստատ ունենք և ունենք փորձը, որը ձեր աչքի առաջ է: Ղարաբաղում խոսք կա՝ փորձված թանը անփորձ մածունից լավ է»,- կատակեց Քոչարյանը: 

Մանրամասները՝ տեսանյութում